Müasir Psixologiya Mərkəzi, Olimpik Star və “Körpəm və mən”sosial qrupunun birgə təşkilatçılığı ilə serebral iflic diaqnozlu Fatimə Dostməmmədovanın növbəti müalicə kursu üçün ehtiyac olan məbləğin toplanması məqsədilə əyləncəli konsert baş tutub. Əyləncə mərkəzində Abdulla Şaiq adına Azərbaycan Dövlət Kukla Teatrı nəzdindəki “Oyuq” teatr studiyasının balaca istedadları tərəfindən tamaşaçılara mahnılar, rəqslər tamaşalar nümayiş olunub.

Sevimli klounun iştirakı uşaqların əyləncəsinə əlavə rəng qatıb.

Tədbirin təçkilatçılarından olan Müasir Psixologiya Mərkəzinin baş psixoloqu Aida Nəbiyeva ASAN Radioya müsahibəsində xeyriyyə tədbirinin keçirilməsində dəstək olan hər bir kəsə təşəkkürünü bildirib. “Bir birimizə dəstək oluruq, Fatiməyə dəstək oluruq. Bu çox gözəl bir şeydir. Ümid edirik ki, yaxın zamanlarda hamımız  birlikdə Fatimənin uğurlarını, irəliləyişlərini  bir-birimizlə bölüşəcəyik” - deyə Aida Nəbiyeva vurğulayib.

Abdulla Şaiq adına Azərbaycan Dövlət Kukla Teatrı nəzdindəki “Oyuq” teatr studiyasının uşaq qrupunun rəhbəri Səidə Haqverdiyeva bu cür tədbirlərdə daima iştirak etdiklərini qeyd edib: "Biz həm də istəyirik ki, burda iştirak edən bizim istedadlı uşaqlarımız da özlərində yaşıdlarına qarşı mərhəmət hissi formalaşsın və bölüşə bilsinlər.

Tədbirdə istedadlı uşaqlarla yanaşı, tanınmış müğənnilər də iştirak ediblər.

Qeyd edək ki, konsertdən əldə olunan gəlir serebral iflic diaqnozlu Fatimə Dostməmmədovanın müalicə xərclərini qarşılayacaq.