ASAN Radio xəbər verir ki, Prezident yanında Qeyri-Hökumət Təşkilatlarına Dövlət Dəstəyi Şurasının dəstəyi və “ASAN Könüllüləri”nin təşkilatçılıği ilə “Könüllülər Yurdu-Azərbaycan” layihəsinə start verilib. Azərbaycan Dövlət Pedaqoji Universitetində layihənin təqdimatı keçirilib. 

Ölkənin 24 şəhər və rayonunu əhatə edəcək - “Könüllülər Yurdu-Azərbaycan” layihəsinin məqsədi - gənclərimizin maarifləndirilməsi, onların şəxsi inkişafına yönəlmiş tədbirlərin həyata keçirilməsi, könüllülük hərəkatının daha da genişləndirilməsidir.

Tədbirdə çıxış edən Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnsan Resursları və Təlim şöbəsinin müdir müavini Cahangir Hacıyev bu layihənin artıq 3 ildir keçirildiyini vurğulayaraq, məqsədin - könüllülük fəlsəfəsinin gənclərə çatdırmaq olduğunu qeyd edib.

Daha sonra çıxış edən "ASAN Könüllüləri" Təşkilatının sədri Bəxtiyar İslamov layihənin gənclər üçün önəmli olduğunu vurğulayıb. O, layihə çərçivəsində könüllülər tərəfindən “Yol Hərəkəti Qaydaları”, “Heyvanların qorunması”, “Kitab oxuma”, “Hüquqi maarifləndirmə”, “Siqaretə qarşı mübarizə”, “Kitab mübadiləsi”,“Ətraf mühitin təmizlənməsi”, “Bərpa işləri” adlı sosial aksiyalar keçiriləcəyini də qeyd edib.

Tədbirlər çərçivəsində 1000-dən artıq gəncin təlim və sosial aksiyalarda iştirakı, 80 min nəfərdən artıq vətəndaşın könüllülük fəaliyyəti haqqında məlumatlandırılması nəzərdə tutulub.

Gənclər arasında könüllü olmaq istəyənlər öz təəssüratlarını ASAN Radio ilə bölüşdülər.

Bakıda başlayan “Könüllülər Yurdu-Azərbaycan” layihəsi avqustun 24-də Qəbələdə başa çatacaq.

ASAN Radionun layihə ilə bağlı audioreportajını linkdən dinləyə bilərsiniz: