Dünya şöhrətli xanəndə, Xalq artisti, Şərəf və Şöhrət ordenli Alim Qasımov bu gün 60 illik yubileyini qeyd edir.

ASAN Radio bildirir ki, Alim Qasımov 1957-ci il avqustun 14-də anadan olub. O, 1978-1982-ci illərdə Asəf Zeynallı adına Bakı Musiqi Məktəbində və 1983-1989-ci illərdə Azərbaycan Dövlət İncəsənət İnstitutunda muğam dərsləri alıb. 1982-ci ildə birinci Respublika muğam müsabiqəsinin qalibi olan Alim Qasımov bir il sonra Səmərqənddə keçirilən Beynəlxalq Musiqi Simpoziumunda iştirak edib.

Bir-birindən gözəl muğamların, təsniflərin, mahnıların mahir ifaçısı olan Alim Qasımov özünəməxsus səsi və avazı ilə nəinki Azərbaycanda, eyni zamanda xarici ölkələrdə də şöhrət qazanıb.

Xanəndənin 2000-ci ildə "Love's deep ocean" diski "Avropa Dünya Musiqi xəritəsi"ndə 9-cu yeri tutub. 2010-cu ildə onun David Vendetta ilə birgə işıq üzü görən "I’m your Goddess" layihəsi də kifayət qədər səs-küyə səbəb olub.

Alim Qasımov eyni zamanda Bakıda keçirilən 57-ci Avroviziya Mahnı Müsabiqəsinin, Birinci Avropa Oyunlarının və IV islam Həmrəyliyi Oyunlarının açılış mərasimlərində və digər mötəbər tədbirlədə çıxış edib.

Sənətkarı yubileyi münasibəti ilə ASAN Radio kollektivi adından təbrik edib, yeni sənət uğurları arzulayırıq.