İndoneziyanın müstəqilliyinin elan olunmasının 72 illiyi ilə əlaqədar bu ölkənin Bakıdakı səfirinin iqamətgahında tədbir keçirilib. ASAN Radio xəbər verir ki, ilk olaraq İndoneziyanın dövlət himni səsləndirilib və "bayraqqaldırma mərasimi" keçirilib.

İndoneziyanın Azərbaycandakı səfiri Hüsnan bey Fananie İndoneziyanın müstəqillik əldə edilməsi uğrunda keçdiyi yoldan danışıb və müstəqillik uğrunda həlak olan həmvətənlilərinin xatirəsini yad edib. Bu bayramın Azərbaycanda qeyd edilməsindən məmnunluq duyğusu keçirdiyini bildirən səfir Hüsnan bey Fananie Azərbaycanla münasibətlərin  ildən-ilə inkişaf etdiyini vurğulayıb: 

“Biz fəxr edirik ki, indoneziyalıyıq. Azərbaycan İndoneziya üçün qardaş ölkədir və Azərbaycan paytaxtında İndoneziyanın müstəqillik gününün qeyd olunması bizim üçün böyük fəxrdir.”

Daha sonra İndoneziya səfirliyi tərəfindən təşkil edilən müsabiqə qaliblərinin, eləcə də Azərbaycan Dillər Universitetinin İndoneziya dilini öyrənən tələbələrinin mükafatlandırılması mərasimi keçirilib.

Tədbir  İndoneziya milli mətbəxinin təamlarının nümayiş etdirilməsi və bədii proqramla davam edib.