Bu gün Bakıda Qlobal Gənc Liderlər Forumu öz işinə başlayıb.

ASAN Radionun məlumatına görə, tədbiri giriş sözü ilə Misirin İsgəndəriyyə Kitabxanasının direktoru, Nizami Gəncəvi Beynəlxalq Mərkəzinin həmsədri İsmail Səragəldin açıb və forumun əhəmiyyətindən danışıb.

Sessiyada çıxış edən Bolqarıstanın sabiq Prezidenti Rosen Plevneliev planetin gələcəyinin gənc liderlərlə birlikdə qurulacağını söyləyib:

"Biz gənclərlə birlikdə planetin gələcəyini daha gözəl edə bilərik. Gənc liderlər sülhməramlı olmalı, müharibəyə qarşı çıxış etməli, dünyanı düzgün istiqamətləndirməlidirlər".

Ukraynanın sabiq birinci xanımı (2005-2010) Katerina Yuşenko elektron hökumət quruculuğunun şəffaflığın təmin edilməsində önəmini qeyd edib: "Hazırda tibb sahəsində sürətli inkişaf müşahidə olunur. Biogenetikanın inkişafı da qeyd olunmalıdır. Kompüterlər tibbi xidmətlərin daha səmərəli olmasına yol açacaq. Biz isə əsas səylərimizi azadlığa yönəltməli və innovasiyalara əlçatanlığı təmin etməliyik".

Latviyanın sabiq Prezidenti Valdis Zatlers Forumun təcrübələrin gənc liderlər tərəfindən öyrənilməsi baxımdan əhəmiyyətli olduğunu qeyd edib.

Qeyd edək ki, Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə keçirilən forum avqustun 24-dək davam edəcək.

Forumun işində Bolqarıstanın sabiq Prezidenti Rosen Plevneliev, Serbiyanın sabiq Prezidenti Boris Tadiç, Xorvatiyanın sabiq Prezidenti İvo Yosipoviç, Latviyanın sabiq Prezidenti Valdis Zatlers, Bosniya və Herseqovinanın sabiq Baş naziri Zlatko Laqumdziya, İsrailin sabiq Prezidenti Dalia İtzik, Nizami Gəncəvi Beynəlxalq Mərkəzinin həmsədri, Dünya Bankının sabiq vitse-prezidenti İsmayıl Seragəldin, Türkiyənin sabiq xarici işlər naziri Hikmət Çətin iştirak edirlər.

Foruma bir sıra digər nüfuzlu ictimai xadimlər, habelə iri korporasiyaların rəhbərlərindən ibarət 20-yə yaxın ali səviyyəli qonaq da dəvət olunub. Həmçinin tədbirə dünyanın 80-ə yaxın aparıcı gənc lider və tədqiqatçısının, dünyanın nüfuzlu ali təhsil ocaqlarının nümayəndələrinin, habelə bir sıra gənc iş adamlarının qatılması gözlənilir.

Toplantı çərçivəsində keçirilən panel iclasları və qrup müzakirələrində gənc liderlər böyük siyasi təcrübəyə malik sabiq dövlət başçıları ilə interaktiv dialoq şəklində müxtəlif mövzular ətrafında fikir mübadiləsi aparacaqlar.

Forumda liderliyin fərdi qiymətləndirilməsi, müasir dövrün ehtiyac duyduğu liderlik formaları, qadın və kişi liderliyi arasındakı fərqlər, həmçinin liderliyin daxili və xarici hüdudları müzakirə olunacaq, debatlar təşkil ediləcək.