Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi Əmək Münasibətlərinin Monitorinqi Mərkəzi təşkilatçılığı ilə “Tikinti Monitorinq Sistemi”nin təqdimat mərasimi keçirilib.

Təqdimatda Fövqəladə Hallar Nazirliyinin, Dövlət Şəhərsalma və Arxitektura Komitəsinin, Mənzil İnşaat Dövlət Agentliyinin, Bakı şəhər İcra Hakimiyyətinin və 11 Yerli İcra Hakimiyyətinin səlahiyyətli nümayəndələri iştirak ediblər.

Tədbirdə  çıxış edən  Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Əmək Münasibətlərinin Monitorinqi Mərkəzinin direktoru Fariz Cəfərov görülən işlər barədə məlumat verib. 

O bildirib ki, Dövlət Agentliyinə qeyri-rəsmi əmək münasibətlərinin qarşısının alınması sahəsində monitorinqin həyata keçirilməsi və nəzarət fəaliyyətinin əlaqələndirilməsi məqsədilə Əmək Münasibətlərinin Monitorinqi Mərkəzi yaradılıb. Bu Mərkəz tərəfindən Bakı şəhərində tikilməkdə olan çoxmənzilli yaşayış binalarının və həmin tikinti obyektlərinin inşası ilə məşğul olan fiziki və hüquqi şəxslərin elektron reyestrini də özünə ehtiva edən“Tikinti Monitorinq Sistemi”nin yaradılması istiqamətində işlər artıq yekunlaşmaqdadır.

Daha sonra Dövlət Agentliyinin Əmək Münasibətlərinin Monitorinqi Mərkəzinin Operativ Nəzarət sektorunun böyük məsləhətçisi Anar İsgəndərov Sistemə giriş və istifadə qaydaları haqqında ətraflı məlumat verərək, dövlət orqanları əməkdaşlarının suallarına ətraflı məlumat verib.

Qeyd edək ki, bu təlimlər həmçinin 18-22 senytabr tarixlərində Bakı şəhərində tikilməkdə olan çoxmənzilli yaşayış binalarının inşası ilə məşğul olan fiziki və hüquqi şəxslərin nümayəndələri üçün də təşkil olunacaq.

Tədbir qarşılıqlı fikir mübadiləsi və sual-cavab şəklində davam etdirilib.