Fəxri Xiyabanda Azərbaycan vokal sənətinin banisi, SSRİ xalq artisti Bülbülün xatirə günü keçirilib. Anım günündə dahi sənətkarın oğlu, Azərbaycanın Rusiyadakı səfiri Polad Bülbüloğlu, Baş nazirin müavini Elçin Əfəndiyev, Mədəniyyət və Turizm nazirinin müavini Ədalət Vəliyev, ziyalılar, dövlət, mədəniyyət və ədəbiyyat nümayəndələri iştirak ediblər. Xatirə günündə Bülbülün sənət yoluna nəzər salınıb, Azərbaycanın vokal sənətinə bəxş etdiyi töhfələrdən söz açılıb.

Dahi sənətkarın oğlu Azərbaycanın Rusiyadakı səfiri Polad Bülbüloğlu ASAN Radioya eksklüziv müsahibəsində ötən günləri xatırlayıb.

"Bülbül bütün əsrlərin sənətkarıdır." Bu fikri isə Baş nazirin müavini Elçin Əfəndiyev ASAN Radioya eksklüziv müsahibəsində bildirib.

Milli Konservatoriyanın rektoru Siyavuş Kərimi bir musiqiçi kimi yetişməyində Bülbülün sənətinin rolundan söz açıb.

Bir çox Xalq artistləri artıq ənənə kimi hər il Fəxri xiyabanda Bülbülü anırlar. Xalq artistləri Səkinə ismayılova, Mələkxanım Əyyubova, Faiq Ağayev radiomuza müsahibə veriblər. Şuşaya qayıtmaq arzusunu, Bülbülün o zaman ruhunun şad olacağını dilə gətiriblər.

Polad Bülbüloğlunun da arzusu var: "O gün olsun ki, Bülbülün, Üzeyir bəyin, xan qızı Natəvanın güllələnmiş abidələri Şuşada bərpa edilsin."

-Bəs həmin gün nə qədər yaxındı və biz nə vaxt Qarabağa qayıdırıq? - sualına o, cavab verməyə çətin çəkib.

Bu gün Bülbülün Şuşada yaşadığı evi erməni işğalındadır. Bir neçə il öncə Polad Bülbüloğlu öz dogma evinə qonaq kimi getmişdi. Ən böyük arzusu isə odur ki, Şuşaya ürəyi istədiyi vaxt  gedə bilsin.