Abdulla Şaiq adına Azərbaycan Dövlət Kukla Teatrı balaca balalarımızın, xüsusi qayğıya ehtiyacı olan uşaqların cəmiyyətə inteqrasiyası yolundakı uğurlu missiyasını davam etdirməkdədir.
Teatrın mətbuat xidmətindən ASAN Radioya xəbər edilib ki, bu çərçivədə növbəti aksiya sentyabrın 28-də baş tutacaq. Belə ki, teatrda “İnternyus Azərbaycan” İctimai Birliyi ilə birgə “Sehrli dünya” adlı tamaşa-konsert təqdim olunacaq. Tədbir Avropa İttifaqı tərəfindən maliyyələşdirilən və BMT İnkişaf Proqramının dəstəyilə həyata keçirilən “Həssas əhali qruplarının sosial-iqtisadi hüquqlarının təşviqində vətəndaş cəmiyyətinin rolunun gücləndirilməsi” layihəsi çərçivəsində reallaşacaq. Aksiyanın əsas məqsədi fiziki məhdudiyyətli uşaqların istedad və bacarıqlarını üzə çıxarmaqla onlara özlərini realizə imkanı yaratmaqdır.
Teatrın nəzdindəki “Oyuq” teatr-studiyasının balaca istedadlarının xüsusi qayğıya ehtiyacı olan balalarımızla birgə ərsəyə gətirdikləri “Sehrli dünya” adlı tamaşa-konsertin ssenari müəllifi studiyanın uşaq qrupunun rəhbəri Səidə Haqverdiyeva, rejissoru Cəmilə Allahverdiyevadır.
Uşaqlara bütün məhdudiyyətlərə rəğmən öz gücünə, istedad və bacarığına inam aşılayan, birlikdə hər bir maneəni dəf etmək ruhuna kökləyən tamaşanın ardınca rəngarəng konsert proqramı da təqdim olunacaq.
Qeyd edək ki, tamaşanın hazırlanmasında Böyük Britaniyanın Azərbaycana Birgə Yardım (UAFA) təşkilatının üzvü istedadlı uşaqlar da yaxından iştirak ediblər. Müəyyən məhdudiyyətli bu balacalar “Oyuq”un təmsilçiləri ilə birlikdə hər kəsə “Biz birlikdə hər çətinliyə qalib gələrik” çağırışını edəcəklər.
Sonda tamaşa-konsertdə iştirak edən balacalara “Sinema Park” kinoteatrlar şəbəkəsi tərəfindən biletlər hədiyyə olunacaq.
XƏBƏR LENTİ
“ASAN Radio” Azərbaycan Respublikasının Prezidenti cənab İlham Əliyevin tapşırığına əsasən yaradılıb.
24 dekabr 2015-ci il tarixindən etibarən Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində (“ASAN xidmət”) yayıma başlayıb.
“ASAN Radio”ya 100 MHs tezliyində ümumrespublika radio yayımı üçün xüsusi razılıq (lisenziya) 2015-ci il sentyabrın 8-də Milli Televiziya və Radio Şurasının (indiki Audiovizual Şura) iclasında verilib.
“ASAN Radio” dövlət xidmətləri sahəsində ixtisaslaşan ilk və yeganə radiodur.
Xidmətlərlə yanaşı, “ASAN Radio” Azərbaycanda və dünyada baş verən vacib xəbərləri dinləyicilərinə birbaşa mənbədən, dəqiq və operativ çatdırır.
Eyni zamanda, dinləyicilər bizim radioda aktual mövzuların müzakirə olunduğu maraqlı verilişlər və keyfiyyətli musiqi dinləyə bilir.
“ASAN Radio” Bakıda və bölgələrdə 100, 96.5, 95.6 və 92.7 FM dalğalarında yayımlanır.
Faydalı Məlumat dalğasını www.asanradio.az saytından və mobil tətbiqlərdən də dinləyə bilərsiniz.
“ASAN Radio” - Dəqiq, Operativ, Faydalı!