“ASAN xidmət” mərkəzinin fəaliyyəti ilə tanışlıq, bu qurumun iş prinsipini öyrənmək həqiqətən çox maraqlıdır. Bunu deməliyəm ki, burada iş prosesi mükəmməl təşkil olunub, avadanlıq ən müasir səviyyədədir. Əminəm ki, ən müasir İKT ilə təchiz olunan bu məkan vətəndaşlarınız üçün mükəmməl məkandır. “ASAN xidmət” mərkəzləri insanlara xidmət etmək üçün yaradılan ictimai yerdir. Burada pasportların verilməsindən tutmuş sürücülük vəsiqəsinin dəyişdirilməsinə qədər ən vacib sənədləri qısa müddətdə almaq mümkündür.

ASAN Radio AZƏRTAC-a istinadən xəbər verir ki, bu fikirləri korrupsiyaya qarşı mübarizəyə dair Bakıda keçirilən beynəlxalq tədbirə Böyük Britaniyadan qatılan Ceyms Hamilton oktyabrın 27-də 5 saylı “ASAN xidmət” mərkəzinin fəaliyyəti ilə tanışlıq zamanı jurnalistlərə müsahibəsində deyib.

“ASAN xidmət” mərkəzlərində vətəndaşların ən çox ehtiyac duyduqları bir çox xidmətlərin vahid məkanda təqdim olunmasının əhəmiyyətini qeyd edən qonaq bildirib: “Fikrimcə, bu, çox yaxşı, təqdirəlayiq və qabaqcıl ideyadır. Burada əlillərin və digər fiziki qüsurları olan insanların da rahatlığı nəzərə alınıb. Etiraf etməliyəm ki, ölkəmdə belə bir mərkəzin olmasını çox istərdim. Bu xidmətlər vətəndaşlara münasibətdə nəzakətli davranışın təmin olunmasına kömək edir. Azərbaycanda yaradılan bu unikal xidmət artıq öz səmərəsini verib. Bu xidmət növü bilavasitə insanların rahatlığına xidmət edir ki, bu da olduqca mühüm əhəmiyyət daşıyır”.