Oktyabrın 15-dən başlayaraq paytaxtımızda şəhər sakinlərinin və qonaqların böyük maraq və sevincinə səbəb olmuş II Bakı Şopinq Festivalı çoxlu sürpriz və yeniliklərlə doludur. Alıcıları Bakı Şopinq Festivalından faydalandırmağı və sevindirməyi qarşıya məqsəd qoyan təşkilatçılar hər bir iştirakçını lotereya uduşlarına dəvət edir.

Azərbaycan Konqreslər Bürosundan ASAN Radioya bildirilib ki, festivalda iştirak edən mağazalardan əldə olunan kuponların lotereya uduşlarının sayı və çərçivəsi açıqlanıb. Belə ki, uduşda 20 mindən çox bilet hədiyyə qazanacaq. Uduşlarda paytaxt sakinləri ilə yanaşı, əcnəbi qonaqlar da iştirak edəcək.

Noyabrın 2-dən 25-dək festival mağazalarından birdəfəyə 100 AZN-dən artıq alış-veriş etmək “Festival sürprizləri” adlı ani stilmullaşdırıcı lotereyada iştirak etmək hüququ qazandırır. Lotereya biletini əldə etmək üçün alış-veriş üzrə elektron vergi hesab-fakturasını Bakı Şopinq Festivalının “Məlumat masası”na təqdim etməklə dəyərli hədiyyə əldə etmək olar. Hər 100 AZN-dən 500 AZN-dək alış-verişə bir bilet, 500 AZN və daha çox alış-verişə isə iki bilet düşür.

Bundan başqa, II Bakı Şopinq Festivalında iştirak edən mağazalarda “Tax Free” xidmətindən yararlanan hər bir alıcı vergi hesab fakturasını təqdim etməklə festival lotereyasının iştirakçısı ola bilər.

Lotereya haqqında www.bakushopfest.com/lotereya/ saytında ətraflı məlumat verilir.