Patent və Əmtəə Nişanları Mərkəzi gənc ixtiraçı Reyhan Camalovanın ixtirasının beynəlxalq qeydiyyatı üçün köməklik göstərəcək, müvafiq prosedurların, ekspertiza və digər hüquqi hərəkətlər üzrə xərcləri öz üzərinə götürəcək.

Dekabrın 4-də Patent və Əmtəə Nişanları Mərkəzində gənc ixtiraçı Reyhan Camalova ilə görüş keçirilib. Görüş çərçivəsində tərəflər arasında müqavilə imzalanıb.

Bu barədə ASAN Radioya Standartlaşdırma, Metrologiya və Patent üzrə Dövlət Komitəsinin mətbuat xidmətindən bildirilib.

Mərkəzin baş direktoru Günel Sevdimalıyeva Hindistanın Heydərabad şəhərində keçirilən VIII Qlobal Sahibkarlıq Sammitində iştirak edən və ixtirası ilə diqqət çəkən Reyhan Camalovanı təbrik edib.

O vurğulayıb ki, Prezident İlham Əliyev tərəfindən qeyri-neft sənayesinin inkişafı məqsədilə həyata keçirilən islahatlar çərçivəsində ixtiraçılığın rolu, innovativ sənayenin təşviqi, texnologiyaların sənayeyə transferi və kommersiyalaşdırılması məsələləri mühüm aktuallıq kəsb edir.

Qeyd olunub ki, Standartlaşdırma, Metrologiya və Patent üzrə Dövlət Komitəsi tərəfindən təsis edilən Patent və Əmtəə Nişanları Mərkəzi sənaye mülkiyyəti obyektlərinin mühafizəsi sahəsində fəaliyyət göstərir. Mərkəz ixtiraçılığın təşviqi, bu sahədə yeni iddiaların araşdırılması, ekspertizası və onların qeydiyyatını həyata keçirir.

Gənc ixtiraçı Reyhan Camalova Hindistanın Heydərabad şəhərində keçirilən VIII Qlobal Sahibkarlıq Sammitində iştirakından və səfər təəssüratlarından danışıb. O, ixtirası haqqında məlumat verərək, müasir dövrdə alternativ enerji mənbələrinə daha çox ehtiyac olduğunu, bu sahəyə xüsusi maraq göstərdiyini və nəticədə yağış suyundan enerji istehsal edən “Rainergy” qurğusunu hazırladığını deyib. Reyhan Camalova öz ixtirasının iş prinsipi barədə də ətraflı məlumat verib.

Tədbirdə ixtiranın beynəlxalq qeydiyyatı üçün köməklik göstəriləcəyi, həmçinin ixtira üzrə müvafiq prosedurların, ekspertiza və digər hüquqi hərəkətlər üzrə xərclərin mərkəzin öz üzərinə götürdüyü diqqətə çatdırılıb.