Cümə günü Rusiyanın Birinci kanalında yayımlanan "Pole çudes" verilişinin növbəti buraxılışı Beynəlxalq çay gününə və Azərbaycana həsr olunub.

ASAN Radio xəbər verir ki, yayım ərzində verilişin çoxmilyonluq auditoriyası Azərbaycanın rəqs, musiqi və çay ənənələri ilə tanış olub, studiyanın özü isə Azərbaycanın milli ornamentləri ilə bəzədilib.

“Pole Çudes”in bu dəfəki yayımına Bakı, Astara və digər bölgələrdən olan vətəndaşlar qatılıblar. 

İştirakçılardan biri isə şoumen, prodüsser və “Bakılı oğlanlar” komandasının aktyorlardan Murad Dadaşov olub. O, aparıcı Leonid Yakuboviçə "Qarabağ" futbol klubunun üzərində futbolçuların imzası olan formasını, müxtəlif Azərbaycan meyvələrindən hazırlanmış mürəbbələr və bir banka neft hədiyyə edib. Möhtəşəm şou ilə bağlı Murad Dadaşaov ASAN Radioya açıqlama verib.

“Mən sizin Azərbaycanda nə qədər çox sevildiyinizi bildiyinizdən əminəm. Sizin gəlişinizdən sonra insanlar o qədər təsirlənmişdilər ki, övladlarını Leonid, hətta Yakuboviç, “Polu Çudes” adlandırmağa başladılar. Bəziləri hətta daha uzağa gedərək Yakuboviçin bığlarını dəb olsun deyə saxladı” – deyə Dadaşov zarafatla aparıcıya deyib.

Bundan sonra Qafqaz papağı və Yakuboviçin bığları olan uşağın fotosunu aparıcıya göstərib.

"Pole Çudes"də Əməkdar artist Həsənağa Sadıqov nəlbəkidə ifası ilə qonaqları təəccübləndirib. 

Şouda tarzən Şəhriyar İmanov da çıxış edib.

Veriliş boyu Azərbaycan milli musiqiləri səsləndirilib və maraqla qarşılanıb.