Ümumi təhsildə xarici keyfiyyətin təminatı sisteminin yaradılmasında Azərbaycan Təhsil Nazirliyinə kömək etmək məqsədilə iki Aİ mütəxəssisi 16-18 yanvar tarixlərində Azərbaycanın paytaxtı Bakıya səfər edəcək. 

Aİ-dən ASAN Radioya bildirilib ki, adı çəkilən missiya Avropa Komissiyasının Texniki Yardım və İnformasiya Mübadiləsi Aləti (TAIEX) tərəfindən Azərbaycan Təhsil Nazirliyi ilə əməkdaşlıq çərçivəsində təşkil edilir.

Azərbaycan məktəbləri üzrə xarici rəyçiləri təmsil edən iştirakçılar Aİ məktəblərinin akkreditasiya sistemi tərəfindən tələb olunan siyahıları tamamlamaq üçün kiçik qruplarda işləyə biləcəklər. Onlar həmçinin məktəblərin akkreditasiyası qaydalarına dair qanun layihəsini, eləcə də zəif və güclü cəhətləri müəyyənləşdirmək məqsədilə ölkədə mövcud normativ-hüquqi aktları, keyfiyyət standartlarını və göstəriciləri müzakirə edəcəklər. 

TAIEX-in səlahiyyətli mütəxəssisləri məktəblərin akkreditasiyası ilə bağlı Aİ təcrübəsini paylaşacaq və Azərbaycanda məktəblər üzrə akkreditasiya standartları və qaydalarının hazırlanmasına yardım göstərəcəklər.

TAIEX tələb yönümlü alət olaraq Aİ ilə imzalanan əməkdaşlıq və ya assosiasiya sazişləri çərçivəsində milli qanunvericilik, normativ-hüquqi aktlar və keyfiyyət standartlarını Aİ-yə üzv ölkələrin qanunvericilik, normativ-hüquqi aktlar və keyfiyyət standartları ilə uyğunlaşdırmaqda tərəfdaş ölkələrə dəstək verir. Şərq Qonşuluğu regionunda TAIEX Ermənistan, Azərbaycan, Belarus, Gürcüstan, Moldova və Ukrayna ilə əməkdaşlıq edir.