"Bir Günəş Altında"  "British Council" "Unlimited" proqramı çərçivəsində Azərbaycanda məhdud imkanlı insanlar tərəfindən yaradılan incəsənəti dəstəkləməyə davam edir.  

British Council Azərbaycan Mədəniyyət və İncəsənət Universiteti, Təhsil Nazirliyi, Mədəniyyət və Turizm Nazirliyi, Azərbaycanın SABAH Qrupu və Nizami Kino Mərkəzi ilə birlikdə "Bir Günəş Altında" pyesinin səhnələşdiriləcəyini qürurla elan edir.

ASAN Radio xəbər verir ki, tamaşanın premyerasında rolları Azərbaycan Mədəniyyət və İncəsənət Universitetindən olan fiziki imkanları məhdud olan və olmayan aktyorlar ifa edir.

"British Council"ın "Unlimited" proqramının tərkib hissəsi kimi həyata keçirilən bu layihə incəsənət fəaliyyəti ilə məşğul olan məhdud imkanlı insanların məkanlara, prodüserlərə və qərar qəbul edən məmurlara çıxışının təmin edilməsi və bu insanların inklüziv əsər yaratmaq və təqdim etmək bacarıqlarının inkişaf etdirilməsi yolu ilə onları dəstəkləyir.  Bu tamaşa fiziki imkanları məhdud olan və olmayan insanların birlikdə çalışıb çətinliklərə sinə gərməsi və inanılmaz cazibəyə malik incəsənət əsərləri yaratmasının bariz nümunəsidir.

Pyes teatrı sosial dəyişikliklər üçün alət kimi istifadə etməyə çalışan DOM teatrının təsisçisi və direktoru Tərlan Rəsulov və daima yeni ideyalar axtarışında olan britaniyalı forum-teatr mütəxəssisi, aktrisa və mühazirəçi Kərin Çapmanın rəhbərliyi altında tamaşaya qoyulur. 

"Bir Günəş Altında" tamaşası Bakının müxtəlif universitetlərində Azərbaycan dilində səhnələşdiriləcək. Tamaşanın premyerası 9 mart tarixində, saat 19:00-da Gənc Tamaşaçılar Teatrında baş tutacaq. Tamaşa ikinci dəfə 13 mart tarixində, saat 19:00-da Nizami Kino Mərkəzində səhnələşdiriləcək. Pyesin müəllifi azərbaycanlı yazıçı Lalə Əliyeva-Kliçkovadır. Pyes tamaşada baş rolu ifa edən motivator və bloqqer Murad Məmmədovun həyat hekayəsinə əsaslanır.

Tamaşada forum-teatr texnikaları istifadə ediləcək.  Bu o deməkdir ki, tamaşa sona çatdıqdan sonra "coker" (kart dəstində heç bir tərəfə məxsus olmayan kart) çıxış edir və auditoriyanı baş qəhrəmanların yerində olsaydılar, hansı seçim edəcəkləri haqqında düşünməyə sövq edir. 

Daha sonra tamaşaya yenidən start verilir və əvvəlki minvalla davam edir,  lakin bu dəfə auditoriyanın fəal üzvü (spect-actor) baş qəhrəmanın başqa cür hərəkət etməli olduğunu düşünərsə, tamaşanı dayandıra, onun yerini ala və ağlına gələn ideyanı sınaqdan keçirə bilər.  Proses bütün fikirlərin nəzərə alınması ilə yekun nəticənin əldə edilməsinə istiqamətlənib. 

"British Council"ın direktoru Elizabet Uayt bu haqda fikirlərini bildirib: "Bu, qeyri-adi insanların iştirakı ilə reallaşdırılacaq çox qeyri-adi və yaddaqalan bir tamaşa olacaq.  Əgər siz forum-teatra heç vaxt baxmamısınızsa, ya da belə bir tamaşada iştirak etməmisinizsə, lakin sizin insanların həyatında yaxşı istiqamətdə dəyişiklər etmək üçün gözəl ideyalarınız varsa, ya da məhdud imkanlı insanların yaratdığı incəsənətlə maraqlanırsınızsa, ya da sadəcə qeyri-adi, cəlbedici və unudulmaz bir sənət əsərinə tamaşa etmək istəyirsinizsə, "Bir Günəş Altında" tamaşasını qaçırmayın.

British Council Azərbaycan fürsətdən istifadə edib Azərbaycanın SABAH Qrupuna, Azərbaycan Mədəniyyət və İncəsənət Universitetinə, Təhsil Nazirliyinə, Mədəniyyət və Turizm Nazirliyinə və Nizami Kino Mərkəzinə dərin təşəkkürlərini bildirir.