May ayının 14-də Dövlət Baytarlıq Nəzarəti Xidmətinin əməkdaşları reyd keçiriblər. Baytarlıq nəzarəti məqsədi ilə aparılan reyd zamanı Montində yerləşən "Ucal-Elgün" MMC heyvan kəsim məntəqəsinin soyuducu kamerasında olan heyvan cəmdəklərindən 6 ədəd hissəyə bölünmüş (şaqqa) heyvan ətinin orqanoleptik göstəriciləri şübhə doğurub. Şübhəli ətlərdən baytarlıq mütəxəssislərinin nəzarəti altında nümunələr götürülərək Respublika Baytarlıq Laboratoriyasına (RBL) göndərilib.

Dövlət Baytarlıq Nəzarəti Xidmətindən verilən xəbərə görə, laboratoriyada aparılan bakterioloji müayinələrin nəticəsinə görə "Ucal-Elgün" MMC heyvan kəsim məntəqəsinin soyuducu kamerasından götürülən ət nümunələrində bakterioloji çirklənmə (BÇQB, stafilakokkus aureus) aşkar olunub. Biokimyəvi müayinə zamanı isə həmin ət nümunələrinin keyfiyyətsiz və baytarlıq-sanitariya cəhətdən yararsız olması müəyyən edilib.

Reyd zamanı "Təzə Bazar" MMC-nin ət qəbulu məntəqəsində Salyan rayonundan paytaxta satış məqsədi ilə, "Ford Transit" 90MG171 dövlət nömrə nişanlı yük avtomobilində mənşəyinə və sağlamlığına dair heç bir sənədi olmayan, üst-üstə yığılmış vəziyyətə, antisanitar şəraitdə, temperatur rejimi gözlənilmədən gətirilən 7 (yeddi) baş iribuynuzlu heyvan cəmdəkləri aşkar edilib.

Ətlərdən baytarlıq qanunvericiliyinə uyğun nümunələr götürülərək Respublika Baytarlıq Laboratoriyasına (RBL) göndərilib.

Kənd Təsərrüfatı Nazirliyi yanında Dövlət Baytarlıq Nəzarəti Xidməti bildirir ki, bu istiqamətdə baytarlıq nəzarəti tədbirləri bundan sonra da ardıcıl olaraq davam etdiriləcək, belə qanuna zidd fəaliyyətlə məşğul olan fiziki və hüquqi şəxslər barəsində ciddi inzibati tədbirlər görüləcək.