Mayın 17-də Rusiyanın paytaxtı Moskva şəhərində yerləşən Rusiya Federasiyasının Rəssamlıq Akademiyasında Azərbaycanın Rusiyadakı fövqəladə və səlahiyyətli səfiri, tanınmısh bəstəkar, gözəl müğənni, uzun müddət Azərbaycan Respublikasının Mədəniyyət naziri kimi fəaliyyət göstərən, Dağıstan Respublikasının əməkdar incəsənət xadimi, Rusiya və Azərbaycan xalqları arasında sülhün, anlaşmanın qorunmasında, dostluq tellərinin möhkəmlənməsindəki xidmətlərinə görə "2009-cu İlin Adamı", 2015-ci ildə "Şərəf" ordeni ilə təltif edilən, Azərbaycan Respublikasinin əməkdar incəsənət xadimi, xalq artisti Polad Bülbüloğlunun möhtəşəm heykəli ucaldılıb.

Heykəlin yaradıcısı Rusiya Rəssamlıq Akademiyasının prezidenti, UNESCO-nun xoşməramlı səfiri, dünya şöhrətli heykəltəraş, xalq rəssamı Zurab Tseretelidir.

Mərasimdə Heydər Əliyev Fondunun vitse-prezidenti Leyla Əliyeva, Azərbaycanın görkəmli alimi, əməkdar elm xadimi, Azərbaycan Dövlət Mükafatı Laureatı, Azərbaycan Milli Elmlər Akademiyasının prezidenti Akif Əlizadə, Moskva Dövlət Humanitar İqtisad Universitetinin rektoru, Rusiya Təbiət Elmləri Akademiyasının müxbir üzvü, Rusiya Humanitar Elmlər Akademiyasının üzvü Vaqif Bayramov, Rusiyanın və Azərbaycanın mədəniyyət və incəsənət xadimləri, Rusiya Federasiyasında akkreditasiya olunmuş bir çox xarici ölkələrin diplomatik nümayəndəliklərinin təmsilçiləri də iştirak ediblər .

Tədbirdə xalq artisti Polad Bülbüloğlunun oğlu 15 yaşlı Murtuza Bülbül mərasimində hər kəsi təəccübləndirib. O səhnəyə çıxaraq, atasının mahnılarından ibarət popurini səsləndirən orkestrə dirijorluq edib və sonra isə Polad Bülbüloğlu bir necə təkrarolunmaz gözəl mahnılarını ifa edib.

Qeyd edək ki, xalq artisti Polad Bülbüloğlu ilk və yeganə azərbaycanlıdır ki, onun heykəli Rusiya Federasiyasının Rəssamlıq Akademiyasında goyulub .