USD - 1.7 EUR - 1.902 RUB - 0.0265 TRY - 0.2889 DAHA ÇOX
SON DƏQİQƏ
Gürcüstan parlamentinin sədri Azərbaycana rəsmi səfərə gəlib Nazir: “Gələn ilin yanvarın 1-dən indeksiya ilə bütün pensiyalar 15 faiz artacaq” Sabah ölkə ərazisində gözlənilən hava şəraiti ilə bağlı məlumat açıqlanıb Dövlət xidmətlərinin göstərilməsi sahəsində ölkəmizdə təşkil olunacaq ilk BMT tədbiri - FOTOLAR Ülvi Mehdiyev: Azərbaycanın təşəbbüsü ilə beynəlxalq təşkilat yaradılacaq
Milli Atçılıq Festivalı keçiriləcək

Azərbaycan Xalq Cümhuriyyətinin yaradılmasının 100 illik yubileyi münasibətilə iyunun 2-17-də Bakıda Milli Atçılıq Festivalı keçiriləcək. Festival çərçivəsində bir neçə yerli və beynəlxalq turnir təşkil olunacaq. Festivalda atçılığın cıdır, konkur, çövkən, polo növləri üzrə yarışlar baş tutacaq.

ASAN Radio xəbər verir ki, bu sözləri Azərbaycan Respublikası Atçılıq Federasiyasının (ARAF) Heydər Əliyev Fondunun dəstəyi ilə təşkil edəcəyi festivalla əlaqədar mayın 31-də “Elite Horse & Polo Club”da keçirilən mətbuat konfransında festivalın Təşkilat Komitəsinin sədri Bəsirət Quliyev deyib.

Təşkilat Komitəsinin sədri vurğulayıb ki, festivalda ümummilli lider Heydər Əliyevin anadan olmasının 95 illik yubileyinə həsr olunmuş yarış da keçiriləcək. İyunun 8-də “Elite Horse & Polo Club”un yaşıl arenasında atçılığın konkur növü üzrə Heydər Əliyev Kuboku turniri təşkil ediləcək. Turnir iki kateqoriyadan ibarət olacaq. İlk kateqoriyada maneələrin hündürlüyü 125, ikinci kateqoriyada isə 145 santimetr təşkil edəcək. Yarışların mükafat fondunun 34 min manat olacağını vurğulayan B.Quliyev iştirakçılara uğurlar arzulayıb.

ARAF-ın vitse-prezidenti, Təşkilat Komitəsinin üzvü Elşad Abbasov qeyd edib ki, festival cıdır yarışları ilə başlayacaq. Yarışlarda bütün milli klublar iştirak edəcəklər. İyunun 2-də Binə Atçılıq Mərkəzində cıdır üzrə “100 illik yubiley kuboku” keçiriləcək. Kubok uğrunda 24 at və jokeyin mübarizəyə qoşulması gözlənilir. Tədbirə gələcək qonaqlar, ölkədə fəaliyyət göstərən atçılıq idman klublarının üzvlərinin iştirakı ilə parad izləmək imkanını da əldə edəcəklər. Cıdırın ümumi mükafat fondu 15 min manatdır.

O bildirib ki, Təşkilat Komitəsi festivalın açılış mərasiminin möhtəşəm və yaddaqalan olması üçün böyük səy göstərir. Festival çərçivəsində bir çox məşhur müğənnilər çıxış edəcəklər.

E.Abbasovun sözlərinə görə, yarışlarda Qarabağ və Dilbaz atlarına üstünlük verilib. Ancaq ikinci yarışda ingilis atları da iştirak edəcək. Üçüncü hissədə isə dörd yaşdan yuxarı Qarabağ və Dilbaz atları yarışacaq.

Çövkən yarışları ilə bağlı məlumat verən Təşkilat Komitəsinin üzvü Natiq Zeynalov son illər çövkən milli atçılıq oyunun bütün dünyada yayılmağa başladığını və inkişaf etdiyini bildirib. Qeyd edib ki, iyunun 5-7-də və 9-da çövkən milli atüstü oyunu üzrə “100 illik yubiley kuboku” turniri keçiriləcək. Turnirdə 8 komanda iştirak edəcək. İyunun 5-də və 6-da təsnifat mərhələləri, bir gün sonra yarımfinal oyunları keçiriləcək. İyunun 9-da isə üçüncülük uğrunda mübarizə və final oyunları ilə turnirə yekun vurulacaq. Bu yarışın mükafat fondu 50 min manat təşkil edəcək.

Təşkilat Komitəsinin digər üzvü Əbülfəz Məlikov iyunun 15-17-də Azərbaycan, Almaniya, İrlandiya və Hindistanı təmsil edən klubların iştirakı ilə ölkəmizdə altıncı dəfə arena polo üzrə dünya kuboku yarışlarının keçiriləcəyini bildirib. Diqqətə çatdırıb ki, üç gün davam edəcək turnirdə ümumilikdə altı görüş olacaq. Azərbaycanı təmsil edən milli polo komandasının idmançılarından ibarət “Elite Horse & Polo Club” komandasının bu turnirə qatılması, yarışları azarkeşlərimiz üçün xüsusilə maraqlı edəcək.

O, polonun çövkən milli oyununun müasir formasının və idmanın bu növünün vətəninin Azərbaycan olduğunu bütün dünyanın bildiyini vurğulayıb.

Sonra Milli Atçılıq Festivalına həsr olunmuş videoçarx nümayiş etdirilib.

Daha sonra festival çərçivəsində keçiriləcək çövkən yarışlarının püşkü atılıb. Püşkün nəticələrinə əsasən, ilk oyunlarda “Kövsər” ilə “Omar”, “Buta Golden” ilə “Murad” komandaları qarşılaşacaqlar. “Kövsər” – “Omar” cütlüyünün qalibi “Ağstafa”, “Buta Golden” – “Murad” cütlüyünün qalibi isə “Ağcabədi” komandası ilə üz-üzə gələcək. “Kövsər”, “Omar” və “Ağstafa” klublarının mübarizəsindən qalib gələcək komanda yarımfinalda “Polad” ilə qarşılaşacaq, “Buta Golden”, “Murad” və “Ağcabədi” kollektivləri arasında qalib olacaq komanda isə yarımfinalda “Sərhədçi” ilə üz-üzə gələcək. Ən güclülər finalda birincilik uğrunda qalib gəlməyə çalışacaqlar.

Sonda mayda Britaniya Kraliçası II Elizabetin doğum günü münasibətilə keçirilən tədbirlərdə Azərbaycan nümayəndə heyətinin möhtəşəm şou proqramla çıxışına dair videoçarx göstərilib.

Əlaqə
Ünvan: Yasamal rayonu, A. M. Şərifzadə küç. 157
Əlaqə nömrəsi: 012 444 74 74
Efir nömrəsi: 012 56 56 100
Whatsapp nömrəsi: 070 65 56 100
Reklam:
Mobil: 050 60 06 100
Şəhər: 012 444 74 74 (daxili 80695)
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində yaradılan “ASAN Radio” dövlət xidmətləri sahəsində ixtisaslaşan ilk və yeganə radiodur. “ASAN Radio”ya 100 MHs tezliyində ümumrespublika radio yayımı üçün xüsusi razılıq (lisenziya) 2015-ci il sentyabrın 8-də Milli Televiziya ... Radio Şurasının iclasında verilib.
© 2018 ASAN Radio