İyunun 24-də Türkiyədə keçirilən növbədənkənar prezident seçkilərində yenidən dövlət başçısı seçilən Rəcəb Tayyib Ərdoğan iyulun 9-da Türkiyə Böyük Millət Məclisində (TBMM) and içib.

ASAN Radio AZƏRTAC-a istinadla xəbər verir ki, əvvəlcə iyulun 8-də Türkiyədə Uzunkörpü-İstanbul marşrutu ilə hərəkət edən sərnişin qatarının qəzaya düşməsi nəticəsində həlak olanların xatirəsi bir dəqiqəlik sükutla yad edilib.

Türkiyənin dövlət himni səsləndiriləndən sonra Ali Seçki Komissiyasının tərtib etdiyi prezidentlik vəsiqəsi Prezident Rəcəb Tayyib Ərdoğana təqdim olunub.

Türkiyə Prezidenti mərasimdə and içib və çıxış edib.

Prezident Rəcəb Tayyib Ərdoğan Türkiyə Respublikasının banisi Mustafa Kamal Atatürkün məzarını - Anıtqəbiri ziyarət edəcək.

Sonra xarici ölkələrin və Türkiyə rəsmilərinin iştirakı ilə rəsmi ziyafət olacaq.

Rəcəb Tayyib Ərdoğan yeni prezidentlik dövründə fəaliyyətə başlaması münasibətilə təşkil olunan rəsmi ziyafətə 22 prezident, 28 baş nazir və parlament sədri, 6 beynəlxalq təşkilat rəhbəri və çox sayda digər xarici qonaq və yerli ictimaiyyətin nümayəndəsi qatılacaq.

Azərbaycanı bu mərasimdə Baş nazir Novruz Məmmədovun rəhbərliyi ilə nümayəndə heyəti təmsil edəcək.

Xatırladaq ki, Türkiyə Ali Seçki Komissiyasının seçkilərin yekunu ilə bağlı rəsmi məlumatına görə, ölkə üzrə təxminən 60 milyon seçicinin 26 milyon 330 min 823 nəfəri Rəcəb Tayyib Ərdoğana səs verib.