Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Regional Medianın İnkişafına Yardım” İctimai Birliyinin “Aprel döyüşlərində şəhid olan Ravil Novruzovun xatirəsinə dair tədbirlərin təşkili”  layihəsi çərçivəsində hazırlanan “Gerçək olan arzu” sənədli filminin təqdimat mərasimi keçirilib. 

ASAN Radio bildirir ki, Quba “ASAN xidmət” mərkəzində təşkil olunan tədbirdə şəhidin ailə üzvləri, döyüş yoldaşları, Quba, Qusar rayon İcra Hakimiyyətinin rəsmiləri, “ASAN xidmət” mərkəzinin nümayəndələri, incəsənət xadimləri və ictimaiyyət nümayəndələri qatılıb. 

Tədbirdə çıxış edənlər Ravil Novruzovun həyat və döyüş yolundan, Aprel döyüşlərində Azərbaycan ordusunun qazandığı şanlı qələbənin əhəmiyyətindən danışıblar. 

Filmin çəkilişləri şəhidin doğulub boya-başa çatdığı Xızı rayonunda və “N” saylı hərbi hissədə keçirilib. Sənədli filmdə şəhid R.Novruzovun obrazını gənc aktyor Rəşad Əliyarov canlandırıb.

“Gerçək olan arzu” adlı ekran işinin “ARB Media Qrup”a daxil olan “ARB Günəş” televiziyasında iyul ayının 30-u saat 21:00-da yayımlanacaq. 

Filmin həmçinin ARB kanalında da yayımlanması planlaşdırılır.

Filmin rejissoru Dəyanət Rzayev, baş prodüseri Vəli Turan, ssenari müəllifi Coşqun Beydullayev, quruluşçu operatoru Elmar Nəbiyevdir.

Ermənistan silahlı qüvvələrinin təxribatları nəticəsində cəbhə bölgəsində gedən döyüşlərdə şəhid olan Azərbaycan Silahlı Qüvvələrinin giziri Ravil Novruzov ölümündən sonra “Hərbi xidmətdə fərqlənməyə görə” 3-cü dərəcəli medalına layiq görülüb.