"Azərbaycanda aqrobiznes dəyər zəncirlərinin yaradılması üzrə fermer və sahiblarlar arasında məlumatlandırma kampaniyası başlayıb".

ASAN Radio Kənd Təsərrüfatı Nazirliyinə (KTN) istinadən xəbər verir ki, bunu qurumun yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev bildirib. 

Onun sözlərinə görə, kampaniyanın məqsədi kənd təsərrüfatı sahəsində dəyər zəncirlərinin yaradılması üzrə qrant layihələrinin hazırlanması üçün fermer və sahibkarları məlumatlandırmaqdır. Aqrobiznes dəyər zənciri layihələrinə qrantlar Dövlət Xidmətinin Dünya Bankı ilə birgə həyata keçirdiyi Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində maliyyələşdirilir.

Bütün ölkəni əhatə edəcək kampaniya çərçivəsində Layihənin əməkdaşları artıq Qəbələ, İsmayıllı, Qax, Şamaxı, Goranboy, Göygöldə fermer və sahibkarlarla görüşüb, onlara qrantlar ayrılması üçün layihələrinin seçim meyarları barədə ətraflı məlumat veriblər.

“Biz bu layihə çərçivəsində 20-dək aqrobiznes dəyər zənciri layihəsinə qrant ayırmağı nəzərdə tutmuşuq. Məlumatlandırmanın birinci mərhələsindən keçən dövrdə təqdim edilmiş layihələri dəyərləndirdik və meyarlara cavab verənləri seçdik. Artıq 5 layihəyə görə müqavilə imzalamışıq. Bir neçə layihə də təsdiqlənmə ərəfəsindədir. Biz bu layihəni həyata keçirməklə, kənd təsərrüfatı məhsulları istehsalında möhkəm, qırılmaz dəyər zəncirlərinin iqtisadiyyatda nümunə ola biləcək pilot modellərini hazırlamaq istəyirik. Sayın məhdud olması da məhz bununla bağlıdır”, - deyə M.Əliyev qeyd edib. 

Dəyər zəncirləri üzrə layihələrin seçimi zamanı üstünlük verilən meyarlara aydınlıq gətirən KTN rəsmisi əsas cəhət kimi istehsalda innovativlik tələbinin qoyulduğunu deyib: “Bundan başqa, qrantdan bir adamın deyil, dəyər zəncirinin bütün üzvlərinin faydalanması nəzərdə tutulduğundan, layihənin tərəfdaşlıq üzərində qurulması, səmərəlilik vəd etməsi, rəqabətqabiliyyətli ixrac potensiallı məhsul istehsal etməsi və idxalı əvəzləməsi dəyər zənciri layihəsini qiymətləndirmə zamanı vacib məqamlardır”.