Oktyabrın 9-da Moskva Hökumətinin binasında “Dağ yəhudilərinin tarixi və mədəniyyəti” kitabının təqdimatı keçirilib. Mərasimdə Azərbaycanın Rusiyadakı səfiri Polad Bülbüloğlu, deputatlar, Dağ yəhudiləri konqresinin üzvləri, Rusiyanın baş ravvini, digər rəsmi qonaqlar, ASAN Radionun direktoru Emin Musavi, mətbuat nümayəndələri  iştirak ediblər.

“Dağ yəhudilərinin tarixi və mədəniyyəti” kitabının təqdimat mərasiminin proqramı zəngin olub. Mərasimdə ASAN Radionun komandasının ərsəyə gətirdiyi - Dağ yəhudilərinin həyatı, tarixi və mədəniyyətindən bəhs edən qısa filmi nümayiş olunub. Qeyd edək ki, Dağ yəhudiləri illərdir Azərbaycanın Quba şəhərinin Qırmızı qəsəbəsində məskunlaşıblar. Tarixi faktlara əsaslanan film böyük zalda nümayiş etdirilib və maraqla qarşılanıb. Film ASAN Radio tərəfindən Ümumdünya Dağ Yəhudiləri Konqresinə hədiyyə edilib. 

Rəsmi hissədən sonra “Moskva yəhudi kişi kapellası” xorunun çıxışı olub, foto və arxiv sənədlərin sərgisi, dağ yəhudilərinin ənənəvi sənətkarlıq nümunələri nümayiş etdirilib. Dağ yəhudiləri mətbəxinin yeməkləri təklif olunub.

“Dağ yəhudilərinin tarixi və mədəniyyəti” kitabı rusiyalı məşhur biznesmen və xeyriyyəçi, Ümumdünya Dağ Yəhudiləri Konqresinin rəhbəri Akif Gilalovun ideyası əsasında və onun təşəbbüsü ilə nəşr edilib. Bu əsər dünyanın müxtəlif ölkələrindən olan bir qrup alim tərəfindən hazırlanıb.

Müəlliflərin fikrincə, bu kitab müasir və gələcək alimlər üçün, habelə dağ yəhudilərinin heyrətamiz icması ilə maraqlanan hər kəs üçün çox dəyərli, hətta ensiklopedik elmi və tədris vəsaiti olacaq.

Dağ yəhudilərinin tarixinin müxtəlif aspektlərinə, habelə bu xalqın ənənəvi və müasir mədəniyyətinə həsr edilmiş bu əsərdə dağ yəhudilərinin etnogenezi problemi, dünyanın müxtəlif dövlətlərində - İsrail, Rusiya, Azərbaycan, ABŞ, Kanada, Almaniya və Avstriyada müasir dağ yəhudiləri qruplarının vəziyyəti təhlil olunub. Rusiyalı və israilli müəlliflərdən ibarət beynəlxalq kollektiv tərəfindən ərsəyə gətirilmiş bu kitab nadir fotoşəkillərlə zəngin illüstrasiya edilib.