Oktyabrın 18-da saat 21:20 radələrində Xəzər dənizinin mərkəzi hissəsində, Pirallahı adasından 21 mil məsafədə Aktau-Bakı marşrutu üzrə hərəkət edən İran İslam Respublikasına məxsus “Nazmehr” quru yük gəmisində heyət üzvlərinin kimyəvi zəhərlənməsi ilə əlaqədar təxirəsalınmaz kömək göstərilməsi üçün müraciət edilməsi barədə Dövlət Dəniz Agentliyindən Dövlət Sərhəd Xidmətinin (DSX) sahil mühafizəsinə məlumat daxil olub.

DSX-nin mətbuat mərkəzindən ASAN Radioya bildiriblər ki, daxil olmuş məlumat dərhal dövlət sərhədinin mühafizəsində olan Dövlət Sərhəd Xidmətinin Sahil Mühafizəsinin sərhəd gözətçi gəmisinə çatdırılıb və İran İslam Respublikası gəmisi olan koordinatlara istiqamətləndirilib.

Sərhəd gözətçi gəmisi 00:30 radələrində “Nazmehr” yük gəmisi-nə yan alıb və 12 nəfər heyət üzvündən (1 nəfər Ukrayna, 11 nəfər İran vətəndaşı) huşsuz vəziyyətdə olan 7 nəfəri gəminin göyərtəsinə götürərək sürətlə sahilə doğru hərəkət edib. İran vətəndaşları “Nazmehr” quru yük gəmisindən təxliyə edilərkən gəmi kapitanı onlardan 3-də həyat əlamətlərinin olmamasını bildirib.

Səhiyyə nazirliyinin mətbuat xidmətinin rəhbəri Pərviz Abubəkirov ASAN Radioya qeyd edib ki, gəmidə 3 nəfər ölmüş vəziyyətdə olub. Gəmi kapitanı xəstəxanaya getməkdən imtina edib, yerindəcə müayinə olunur. Onun gəmini tərk etmə ixtiyarı yoxdur. Digər 4 nəfərə ilkin tibbi yardım göstərilib, hazırda KTM-in Toksikologiya şöbəsində müalicə olunurlar, vəziyyətləri orta ağır qiymətləndirilir.