Azərbaycan Tələbə Gənclər Təşkilatları İttifaqı, Gənclər və İdman Nazirliyi tərəfindən 2013-2014-cü illərdə Heydər Əliyev Sarayında “Univiziya” tələbələrin I beynəlxalq mahnı yarışması keçirilib. Həmin yarışma ali təhsil müəssisələrində təhsil alan tələbələr arasında təşkil olunmuşdu. Bu ildən müsabiqənin əhatə dairəsi genişləndirilib və buraya 14-35 yaşlı gənclər cəlb edilib və müsabiqənin adı “Youthvision” olaraq dəyişdirilib.

AZƏRTAC xəbər verir ki, bu sözləri Gənclər və İdman Nazirliyinin mətbuat katibi Səmayə Məmmədova iyunun 7-də keçirdiyi mətbuat konfransında deyib.

S.Məmmədova bildirib ki, “Youthvision” mahnı müsabiqəsi bu il iyunun 22-24-də Heydər Əliyev Sarayında keçiriləcək. Müsabiqənin reallaşması təşəbbüsü Azərbaycan Tələbə Gənclər Təşkilatları İttifaqına məxsusdur. Yarışma İttifaqla birgə Gənclər və İdman Nazirliyi tərəfindən keçiriləcək. Artıq müsabiqə ilə bağlı “youthvision.az” saytı yaradılıb. Müsabiqəyə qatılacaq iştirakçılar, münsiflər sayt vasitəsilə qeydiyyatdan keçərək müvafiq sənədləri doldurub, ifa olunacaq mahnıları təşkilat komitəsinə təqdim ediblər.

S.Məmmədova deyib ki, Təşkilat Komitəsi tərəfindən seçilən ən yaxşı ifaçılara müsabiqədə iştirak üçün dəvət məktubu göndərilib. Müsabiqədə Azərbaycan, Albaniya, Almaniya, Belarus, Braziliya, Finlandiya, Gürcüstan, Böyük Britaniya, İordaniya, İsrail, İran, İtaliya, Kolumbiya, Litva, Latviya, Moldova, Polşa, Qazaxıstan, Rumıniya, Rusiya, Serbiya, Türkiyə, Ukrayna və Yunanıstandan gənc ifaçı və münsiflər iştirak edəcəklər. Müsabiqədə ilk dəfə səsləndirilən və ya tanınmış mahnılar ifa edilə bilər. Hər ölkəni öz münsifi təmsil edir. Münsiflər heyətinin hər bir üzvü öz ölkəsindən olan iştirakçıdan başqa digər iştirakçıların ifalarını 1, 2, 3, 4, 5, 6, 7, 8, 10 və ya 12 balla qiymətləndirə bilər. Ən yüksək bal toplayan iştirakçı müsabiqənin qalibi olacaq. İlk üç yerin qalibi pul və qiymətli hədiyyələrlə mükafatlandırılacaq.