Rusiya Federasiyasının Saxa (Yakutiya) Respublikasının Yakutsk şəhərində “Olonxo torpağında UNESCO şedevrləri ilə görüş” adlı üçüncü beynəlxalq festival keçirilib. VI beynəlxalq “Asiya uşaqları” idman oyunlarının mədəni proqramı çərçivəsində təşkil olunan festivalda ölkəmizi Əməkdar artist, beynəlxalq müsabiqələr laureatı, tarzən Sahib Paşazadə təmsil edib.

Mədəniyyət və Turizm Nazirliyindən Trend-ə verilən məlumata görə, tarzən bildirib ki, festivala UNESCO-nun siyahılarında mirasları təmsil olunan ölkələrin mədəniyyət və incəsənət adamları qatılıb: “Bizim tar və muğam sənətimiz də bu siyahıya daxil edildiyi üçün Yakutiya Filarmoniyasının direktoru tərəfində “Symphonica ARTica” simfonik orkestri ilə birgə çıxış məqsədilə Azərbaycan Dövlət Filarmoniyasının rəhbərliyinə məktubla müraciət olunmuşdu. Mən də festivalda iştirakı məmnunluqla qəbul etdim. Aprel ayında orkestrə Hacı Xanməmmədovun “Tar və simfonik orkestr üçün 2 saylı konsert”, Səid Rüstəmovun “Oxu, tar”, Fərhad Bədəlbəylinin “Şuşa”, Aqşin Əlizadənin “Cəngi”, Həmid Vəkilovun “Şıdırğı” və “Çılğın rəqs”, Həsən Rzayevin “Çahargah rapsodiyası”, Ələkbər Tağıyevin “Sən gəlməz oldun”, Azərbaycan xalq mahnısı “Sarı gəlin”, “Xaric segah” muğamı və s. əsərlərdən ibarət proqram göndərdim”.

S.Paşazadə iyulun 5-də festivalın açılış mərasimində “Çahargah” muğamı ilə çıxış edib. Konsertdən sonra çoxsaylı izləyicilər ifaçıya yaxınlaşıb tar aləti ilə maraqlanıblar. İyulun 7-də festival çərçivəsində Nataliya Bazalevoyun rəhbərlik etdiyi “Symphonica ARTica” orkestri ilə birlikdə “Qədim tarın sehri” adlı 2 saat yarımlıq geniş solo konsert proqramı ilə çıxış edib. Konsert musiqisevərlər tərəfindən maraqla qarşılanıb, o, yenidən səhnəyə dəvət olunub və yenə “Çahargah” muğamını səsləndirib.

Gənc musiqiçi uğurlu çıxışına görə Yakutiya Dövlət Televiziyasına dəvət edilib və Azərbaycan muğamı, musiqisi, tar aləti haqqında fikirlərini yerli tamaşaçılarla bölüşüb. O, Azərbaycan tarı, müasir tar sənəti, tar aləti ilə sintez edilən musiqi janrları, tarın inkişaf tarixi haqqında mühazirə oxuyub. Ayın 8-də Yakutiya Dövlət Gənc Tamaşaçılar Teatrında tarzənlə yaradıcılıq görüşü və ustad dərsləri təşkil edilib. Ustad dərsləri zamanı muğam və tar aləti, Üzeyir Hacıbəyli və Azərbaycan musiqisi haqqında mühazirələr canlı ifa ilə müşayiət olunub.

Festivalın bağlanış mərasimində S.Paşazadə Azərbaycan tarı və rus xalq mahnılarından bir neçəsinin sintezindən ibarət musiqi kompozisiyası təqdim edib. Bu çıxış da böyük alqışlarla qarşılanıb. Yerli mətbuatda konsert haqqında gedən məqalələrdə “Azərbaycan tarı Yakutiyanı fəth etdi” başlıqlı yazılar işıq üzü görüb. Əməkdar artist vətənə festivalın 5 fəxri diplomu ilə qayıdıb.

Qeyd edək ki, bu il S.Paşazadə üçün yaradıcılıq baxımından uğurlu olub. Belə ki, o, fevralın 22-dən martın 19-na qədər SSRİ Xalq artisti Fərhad Bədəlbəyli ilə birlikdə ABŞ-ın 17 ştatında konsert proqramı ilə çıxış edib. Həmçinin dirijor Dmitri Yablonskinin rəhbərliyi altında Yerusəlim Simfonik Orkestri ilə bir səhnəni bölüşüb.