Sentyabrın 27-də  Azərbaycan professional vokal sənətinin banisi, SSRİ xalq artisti Bülbülün anım günü qeyd olunub. Tədbir Fəxri Xiyabanda, Bülbülün məzarı üzərində başlayıb. Azərbaycanın Rusiyadakı fövqəladə və səlahiyyətli səfiri Polad Bülbüloğlu əvvəlcə çıxış edərək mərasimdə iştirak edənlərə öz təşəkkürünü bildirib. Sonra Bəstəkarlar İttifaqının sədri, xalq artisti Firəngiz Əlizadə çıxış edib. Bülbülün Azərbaycan incəsənəti tarixində yeri və rolundan danışıb. Daha sonra çıxış edən Bakı Musiqi Akademiyasının rektoru Fərhad Bədəlbəyli isə Bülbül barədə xatirələri yada salıb.

Anım mərasimində Şuşa Rayon İcra Hakimiyyətinin başçısı, Dağlıq Qarabağın Azərbaycanlı İcmasının rəhbəri Bayram Səfərov, həmçinin Azərbaycan Milli Konservatoriyasının rektoru Səyavuş Kərimi, Azərbaycan Dövlət Filarmoniyasının direktoru Murad Adıgözəlzadə, Beynəlxalq Muğam Mərkəzinin direktoru Murad Hüseynov, o cümlədən xalq artistləri Yalçın Adıgözəlov, Arif Babayev, Canəli Əkbərov, Səkinə İsmayılova və başqaları iştirak edib. Mərasim Bülbül adına Fondda davam etdirilib.

Qeyd edək ki, Bülbül 26 sentyabr 1961-ci ildə vəfat edib.

Xalq artistləri Canəli Əkbərov və Səkinə İsmayılova dahi Bülbül haqqında fikirlərini ASAN Radio ilə bölüşüblər.

Aşağıdakı Linkdən səs yazısını dinləyə bilərsiniz.