ASAN Radio xəbər verir ki, Təhsil Nazirliyi və ASAN xidmətin birgə təşkilatçılığı ilə həyata keçirilən “Məktəblinin dostu” layihəsi çərçivəsində seçilmiş gənclər üçün treninqlər başlayıb. Treninqlər Fövqəladə Hallar, Səhiyyə nazirlikləri, Asan Xidmət, Bakı Şəhəri üzrə Təhsil İdarəsinin nümayəndələri tərəfindən keçiriləcək. 5 saylı peşə litseyində baş tutan tədbirdə layihənin koordinatoru Rüstəm Ağayev bildirib ki,  ilkin mərhələsində bu layihə Bakı üzrə 30 ümumi təhsil müəssisəsini əhatətə edir.

“Məktəblinin dostu” olmaq üçün keçirilən müsabiqədə 21-30 yaş arasında olan 197 gənc uğur qazanıb. Layihənin əsas vəzifələri müəllim və şagirdlər üçün təhlükəsiz mühit yaratmaq, ilk tibbi və psixoloji yardım göstərmək, mütəmadi olaraq şagird, valideyn, müəllim, təlim-tərbiyə müəssisələrinin kollektivi və rəhbərliyi ilə maarifləndirmə və diaqnostik işlərin aparılması olacaq”.

Müəyyən müddətdən sonra nazirlik Asan Xidmətlə birlikdə monitorinq keçirəcək, şagirdlərin, valideynlərin və məktəb heyəti üzvlərinin fikirləri öyrəniləcək. Bundan sonra layihəni genişləndirmək üçün növbəti addımlar atılacaq. Layihə uğurlu olarsa, genişləndirilərək ölkənin digər şəhər və rayonlarında da həyata keçiriləcək. “Asan Xidmət Mərkəzi” İnsan resursları və təlim şöbəsinin müdir müavini Cahangir Hacıyev: “Seçilmiş namizədlər arasında kifayət qədər gənclərimiz var ki, ASAN School könüllülük məktəbinin məzunu olmayıblar.Biz belə qərara gəldik ki,bütün layihə iştirakçıları  ilk öncə ASAN School könüllülük məktəbindən keçərək məzun adını qazanacaqlar,daha sonra məktəblərdə könüllü kimi fəaliyyətə başlayacaqlar. Beləliklə, biz ASAN dəyərlərini məktəblərə daşımış olacayıq”.

Qeyd edək ki, treninqlər başa çatdıqdan sonra yenidən imtahanlar keçiriləcək və bu dəfə imtahanlardan uğurla keçmiş gənclər “Məktəblinin dostu” adını qazanacaqlar.