ASAN Radio xəbər verir ki, oktyabrın 22-dən 30-dək Azərbaycanın paytaxtı Bakı şəhərində “Bakı Beynəlxalq Caz Festivalı” keçirilir.

Tədbir Mədəniyyət və Turizm Nazirliyinin təşkilatçılığı ilə baş tutur.

Mühüm məqam ondan ibarətdir ki, ilk dəfə olaraq Beynəlxalq Muğam Mərkəzində keçirilən tədbir radio vasitəsilə canlı yayımlanır və bu canlı yayım eksklüziv olaraq ASAN Radio vasitəsi ilə həyata keçirilir.

Bakı Beynəlxalq Caz Festivalı ölkəmizin mədəni həyatında özünəməxsus yer tutur. İlk növbədə ona görə ki, bu festival ölkələr arasında əlaqələrin möhkəmləndirilməsi və genişləndirilməsinə, dünya ölkələrinin mədəni irsinin axtarışına əvəzsiz töhvəsini verir.

Ümumiyyətlə, bu, sayca 11-ci Bakı Beynəlxalq Caz Festivalıdır. İlk dəfə bu festival paytaxtımızda 2005-ci ildə keçirilib. Bakı Beynəlxalq Caz Festivalının  keçirilməsi ideyası isə Azərbaycanın əməkdar artisti və tanınmış cazmen Rain Sultanova məxsusdur.

"Bakı Beynəlxalq Caz Festivalı"nın ilk günündə Braziliyadan olan məşhur cazmen, nəfəs qarmonu ustası Qabriel Qrossi öz məharətilə tamaşaçıların qarşısına çıxıb.

Qeyd edək ki, Beynəlxalq Muğam Mərkəzində keçirilən tədbirdə Mədəniyyət və Turizm naziri Əbülfəs Qarayev də iştirak edib. Mərasimdən sonra nazir öz təəssüratlarını ASAN Radio ilə bölüşüb.

Aşağıdakı linkdən səs yazısını dinləyə bilərsiniz.