Azərbaycanın ənənəvi sürüşmə rayonlarındakı fəallıq demək olar ki, pik həddə çatıb, dövlət əhəmiyyətli Bakı-Quba-Rusiya dövlət sərhədi yoluna yaxın ərazilərdə isə sürüşmə sahələrində yüksək fəallıq müşahidə edilir.
Bunu Trend-ə Azərbaycan Milli Elmlər Akademiyasının Coğrafiya İnstitutunun direktor müavini Elbrus Əlizadə deyib.
Onun sözlərinə görə, uzun müddət davam edən yağıntılar ölkə ərazisindəki sürüşmə sahələrinin kəskin fəallaşmasına səbəb olub: “Klassik sürüşmə rayonlarında fəallıq demək olar ki, pik həddə çatıb. Bu ərazilərə Şamaxı, Ağsu, İsmayıllı rayonları, xüsusilə Ağçay dərəsində, yəni Muğanlı sürüşmə zonası və ona yaxın ərazilərdə, Basqal kəndinin yaxınlığında, Lahıc yolu və onun ətrafında olan, Girdimançay hövzəsindəki sürüşmə sahələri aiddir”.
E.Əlizadə əlavə edib ki, hazırda İsmayıllının İstisu kəndində sürüşmə prosesi davam edir. Bundan başqa, Böyük Qafqazın şimal-şərq yamacında - Quba, Qusar, Siyəzən, Şabran, Xızı rayonlarında da sürüşmə sahələri xeyli fəallaşıb, hətta dövlət əhəmiyyətli Bakı-Quba-Rusiya dövlət sərhədi yoluna yaxın ərazilərdə sürüşmə sahələrində yüksək aktivlik nəzərə çarpır.
E.Əlizadə qeyd edib ki, həm yağıntıların çox düşməsi, həm də yağan qarın əriməsi nəticəsində Quba-Xınalıq yolunun bir neçə hissəsində uçqun xarakterli sürüşmə hadisələri qeydə alınıb. Hazırda həm Bakı-Qobustan-Şamaxı-Ağsu, həm Şamaxı-Muğanlı-İsmayıllı, həm də Lənkəran-Lerik yolunda və digər kənd arası yollarda sürüşmə sahələrində fəallıq var: “Rütubətli dövrün hələ bir neçə gün davam edəcəyini nəzərə alsaq, onda gərginliyin də xeyli davam edəcəyini gözləmək olar. Nəzərə almaq lazımdır ki, sürüşmə sahələrindəki gərginlik adətən, yağıntı mövsümü qurtardıqdan sonra bir neçə həftəyə qədər davam edir”.
XƏBƏR LENTİ
“ASAN Radio” Azərbaycan Respublikasının Prezidenti cənab İlham Əliyevin tapşırığına əsasən yaradılıb.
24 dekabr 2015-ci il tarixindən etibarən Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində (“ASAN xidmət”) yayıma başlayıb.
“ASAN Radio”ya 100 MHs tezliyində ümumrespublika radio yayımı üçün xüsusi razılıq (lisenziya) 2015-ci il sentyabrın 8-də Milli Televiziya və Radio Şurasının (indiki Audiovizual Şura) iclasında verilib.
“ASAN Radio” dövlət xidmətləri sahəsində ixtisaslaşan ilk və yeganə radiodur.
Xidmətlərlə yanaşı, “ASAN Radio” Azərbaycanda və dünyada baş verən vacib xəbərləri dinləyicilərinə birbaşa mənbədən, dəqiq və operativ çatdırır.
Eyni zamanda, dinləyicilər bizim radioda aktual mövzuların müzakirə olunduğu maraqlı verilişlər və keyfiyyətli musiqi dinləyə bilir.
“ASAN Radio” Bakıda və bölgələrdə 100, 96.5, 95.6 və 92.7 FM dalğalarında yayımlanır.
Faydalı Məlumat dalğasını www.asanradio.az saytından və mobil tətbiqlərdən də dinləyə bilərsiniz.
“ASAN Radio” - Dəqiq, Operativ, Faydalı!