ASAN Radio xəbər verir ki, əməkdar artist, tanınmış müğənni Röya Ayxan ASAN Radionun canlı efirində tanınmış aparıcı Emin Musavi ilə xüsusi buraxılışda bir sıra eksklüziv və maraqlı açıqlamalar verib.

Müğənni bildirib ki, yeni konserti noyabrın 25-27-də Heydər Əliyev sarayında baş tutacaq. Konsertin adı isə “Qadın”dır.

Solo fəaliyyətinə başlamasının 15-ci ildönümünün tamam olduğunu qeyd edən Röya özünün gələcək planları, ifa etdiyi, ifa etməyə planlaşdırdığı, yeni aranjımanda təqdim etdiyi mahnı kompozisiyaları haqqında danışıb.

Dinləyicilərin canlı zənglərini cavablandıran məşhur müğənni onların canlı mahnı oxumaq xahişlərini yerindəcə yerinə yetirərək ASAN Radionun efirindən səsləndirib.

“Populyarlıq bitəndən sonra nə olacaq” sualına Röya belə cavab verib: “Düşünmürəm ki, mənim populyarlığım nə vaxtsa bitsin. Mən həmişə populyar olacam”.

Röya bildirib ki, teleefirlərdə az görünməsinin səbəbi onun bütün vaxtını işə sərf etməsidir. O deyib ki, “mənim üçün sənətimin yeni hissəsi başqa ölkədə fəaliyyət göstərməklə bağlıdır”.

Röya Ayxan şəxsi həyatı ilə bağlı bəzi məsələlərə də toxunub. Məsələn, həyat yoldaşından ayrıldığını xatırladan müğənni bildirib ki, “kişini çox sıxanda o, gedib başqasını alır. Kişini çox sıxmaq olmaz”.

O, həmçinin vurğulayıb ki, övladı Hüseynin böyüdülməsi və tərbiyəsində keçmiş həyat yoldaşı da iştirak edir: “Uşağı, bizim Hüseyni, çox sivil şəkildə, davasız böyüdürük”.

Röya Ayxan bütün televiziya və radio işçilərini qarşıdan gələn 6 noyabr - peşə bayramları münasibətilə təbrik edərək onlara fəaliyyətlərində böyük uğurlar arzu edib.

Röya Ayxan canlı yayımı bu sözlərlə bitirib: “Azərbaycan sənətində ən çox sevilən qızam”.