Daha bir marşrutun hərəkət istiqaməti dəyişdirilib.

ASAN Radio xəbər verir ki, bu barədə Bakı Nəqliyyat Agentliyi xəbər yaıb.

Məlumata görə, 21 nömrəli avtobus xətti ilə bağlı metronun Əhmədli stansiyası, Məhəmməd Hadi küçəsi, Ukrayna dairəsi, Gəncə prospekti, Zığ yolu, Nobel prospekti, Həzi Aslanov qəsəbəsi, metronun “Xətai” stansiyası, Səməd Vurğun bağı ətrafındakı ərazilərdə yaşayan sərnişinlər tərəfindən Agentliyə şikayətlər daxil olub. Buna səbəb nəqliyyat vasitələrinin texniki cəhətdən tamamilə nasaz vəziyyətdə olması göstərilib. Bakı Nəqliyyat Agentliyi monitorinqlər keçirərək şikayətlərin əsaslı olduğunu təsdiqləyib.

Bunları nəzərə alan Agentlik 21 nömrəli avtobus xəttinin istifadə hüququnu “BakuBus” MMC-nin istifadəsinə verməklə həmin xətt üzrə “İVECO” markalı avtobusları sərnişinlərin istifadəsinə verib.

Bundan sonra 21 nömrəli marşrutun hərəkəti dəyişdirilərək “28 May” metro stansiyası – Puşkin küçəsi – Neftçilər prospekti – Nobel prospekti – “Əhmədli” metro stansiyası olmaqla müəyyən edilib. Avtobusların hərəkət cədvəli səhər saat 6:00-dan gecə saat 12:00-a qədərdir. Gediş haqqı yalnız “BakıKart” vahid ödəniş kartları ilə həyata keçirilir.

14 nömrəli marşrut xətti ilə 21 nömrəli marşrut xəttinin trayektoriyası bəzi dayanacaqlarda təkrarlandığı üçün 14 nömrəli marşrut xəttinin son dayanacağı dəyişdirilərək metronun “28 May” stansiyası müəyyənləşdirilib. 14 nömrəli marşrut xətti artıq metronun “Xətai” stansiyasındakı dayanacağa daxil olmayacaq.