USD - EUR - RUB - TRY - DAHA ÇOX
YENİLİKLƏR
Mənəvi dəyərlər: Əxlaq və din Mərkəzi Bankın departament direktoru ASAN Radioda sualları cavablandıracaq  “ASAN Həyat” verilişində “Baku FinTech Forum 2023” tədbiri barədə danışılacaq "Su Gündəmi" verilişində mütəxəssislərə sual verə bilərsiniz "Həyat sığorta ilə rahat"
Mehriban Əliyeva: “Müstəqil Azərbaycanda doğulub böyümək ən böyük xoşbəxtlikdir”

Heydər Əliyev Fondu Dünya Azərbaycanlılarının Həmrəylik Günü və Yeni il bayramları ərəfəsində “Buta” sarayında uşaqlar üçün ənənəvi şənlik təşkil edib.

ASAN Radio xəbər verir ki, Heydər Əliyev Fondunun prezidenti Mehriban Əliyeva, Fondun vitse-prezidenti Leyla Əliyeva və Arzu Əliyeva uşaqların bayram şənliyində iştirak ediblər.

Heydər Əliyev Fondunun prezidenti Mehriban Əliyevanın təşəbbüsü ilə hər il Dünya Azərbaycanlılarının Həmrəylik Günü və Yeni il ərəfəsində uşaq evləri və internat məktəblərində tərbiyə alan, Daun Sindromlu Şəxslərin Reabilitasiya Mərkəzinin, Psixonevroloji Mərkəzin azyaşlı sakinləri üçün şənlik təşkil edilir.

Bayram şənliyi ulu öndər Heydər Əliyevin, Prezident İlham Əliyevin və Heydər Əliyev Fondunun prezidenti Mehriban Əliyevanın uşaqlarla görüşündən, gənc nəslə diqqət və qayğısından bəhs edən videoçarxın nümayişi ilə başlayıb.

Hər il olduğu kimi, bu il də şənlik iştirakçılarına yeni tərtibatda hazırlanan proqram təqdim edilib. Bu proqram, sarayda balacalar üçün qurulan və əsl bayram əhvali-ruhiyyəsi bəxş edən dekorasiyalar uşaqların sevincini daha da artırıb. Bər-bəzəkli sarayda rəqslərə qoşulan, mahnılar ifa edən, məharətlərini göstərən, möcüzələrə heyrət edən uşaqların sevinci hədsiz idi. Çünki Heydər Əliyev Fondunun təşkil etdiyi bayram və bu şənlikdə tanınmış sənətçilərin, sevimli nağıl və cizgi filmləri qəhrəmanlarının bir-birindən maraqlı çıxışları məhz onlara ünvanlanıb. Bayram şənliyində uşaqların təbəssümü bu sevinci onlara bəxş edən Heydər Əliyev Fondunun fəaliyyətinə verilən ən yüksək qiymət idi.

Bayram şənliyi üçün hazırlanan musiqili kompozisiyada peşəkar incəsənət ustaları ilə yanaşı, Bakının 1 və 2 saylı uşaq evlərinin, Daun Sindromlu Şəxslərin Reabilitasiya Mərkəzinin uşaq kollektivləri də maraqlı proqramla çıxış ediblər. Balacaların sevimli cizgi filmlərinin qəhrəmanlarını canlandıran personajlar şənlik iştirakçılarında gözəl həyəcan hissləri doğurub. Səhnəciklər, oynaq, şux mahnılar, rəqslər bayram tədbirini daha da rəngarəng edib.

Qış nağılını xatırladan sarayda uşaqlar bayram ərəfəsində sevimli qəhrəmanların əhatəsində oldular, onlarla birlikdə şənləniblər.

2004-cü ildən fəaliyyət göstərən Heydər Əliyev Fondu nəcib, xeyirxah və humanist insani dəyərlərə əsaslanaraq, başlıca fəaliyyət istiqamətlərindən biri kimi cəmiyyətdə xeyriyyəçilik institutunun inkişafını seçib. Fondun bu istiqamətdə dövlətin fəaliyyətinə hərtərəfli dəstəyə əsaslanan nəcib, xeyirxah işləri digər qurumlar üçün nümunə sayıla bilər. Fondun xeyriyyəçilik fəaliyyətinin əsas motivini insanlara sevgi və təmənnasız olaraq xeyirxah əməllər təşkil edir. Azərbaycanın birinci xanımı dəfələrlə “Uşaqlar Azərbaycanın sabahıdır, gəlin onların problemlərinə biganə qalmayaq” fikrini vurğulayıb. Mehriban Əliyevanın rəhbərlik etdiyi Fond valideyn himayəsindən məhrum olan uşaqların problemlərinin həllinə xüsusi diqqət ayırır, “Uşaq evlərinin və internat məktəblərin inkişafı” Proqramı çərçivəsində respublikada uşaq müəssisələrini əsaslı təmir edərək, yeni avadanlıqlarla təchiz edir. Xeyirxahlıq, mərhəmət və humanizm insanlığın zinətinə çevrilən ali dəyərlərdən sayılır. Cəmiyyətdə nəcibliyin, mərhəmət və xeyirxahlığın ali ünvanına çevrilməklə, ümumxalq mənafeləri baxımından bir sıra strateji layihələri qısa müddətdə uğurla gerçəkləşdirən Heydər Əliyev Fondunun 12 illik çoxşaxəli fəaliyyəti də məhz bu nəcib dəyərlərə söykənir.

Bayram şənliyində çıxış edən Azərbaycanın birinci xanımı Mehriban Əliyeva bildirib ki, 12 ildir Heydər Əliyev Fondu Bakıda yerləşən bütün uşaq evlərində, internat məktəblərində yaşayan, tərbiyə və təhsil alan uşaqlar üçün yeni il şənlikləri təşkil edir. “Yeni il həm uşaqların, həm də böyüklərin ən sevimli bayramlarından biridir. Adətən bu bayramı insanlar doğmaları və əzizləri ilə bərabər qeyd edirlər. Mən çox şadam ki, bu gün biz böyük bir ailə, ən əziz insanlar kimi 2017-ci ili birgə qarşılayırıq.

Əziz uşaqlar, ömrünüzün bu çağında sizin ən əsas vəzifəniz yaxşı oxumaqdır, bilik, savad qazanmaqdır. Mən ümidvaram ki, siz bu ili yaxşı qiymətlərlə və ən əsası da yeni biliklərlə başa çatdırırsınız. Sizin qarşınızda böyük ömür yolu var. Bu ömür yolunda layiqli, sağlam, savadlı, bacarıqlı vətənpərvər insan olmaq üçün bu gün tam gücünüzlə təhsil alıb oxumalısınız. Bu yolda sizə müəllimləriniz kömək edir. Bu gün Azərbaycanın bütün müəllimlərinin əməyini qeyd etmək istəyirəm. Bütün peşələr dəyərlidir, qiymətlidir, gözəldir. Lakin müəllimlik elə bir peşədir ki, onun məhsulu insandır. Biz bilirik ki, hər bir ölkənin, hər bir cəmiyyətin gələcəyi onun yeni nəslindən asılıdır. Ona görə müəllimlik ən müqəddəs, ən şərəfli peşədir. Təkcə hansısa bir fənni tədris etməklə, bilik verməklə müəllimin vəzifəsi bitmir. Müəllim səylərini yüksək mədəniyyətə, milli-mənəvi dəyərlərə, geniş dünyagörüşünə malik olan, xalqa, Vətənə layiqli, vətənpərvər vətəndaş böyütməyə yönəldir. Mən əminəm ki, əziz uşaqlar, siz məhz belə insanlar kimi böyüyəcəksiniz. Bizim arzumuz sizləri mənəvi və fiziki sağlam, savadlı, bilikli, mədəniyyətli, güclü, iradəli vətənpərvər görməkdir. Siz müstəqil Azərbaycanda doğulmusunuz və müstəqil Azərbaycanda böyüyürsünüz. Bu, sizin ən böyük xoşbəxtliyinizdir.

Ötən 2016-cı ildə Azərbaycan müstəqilliyinin bərpa olunmasının 25-ci ildönümünü qeyd etdi. Bu, bizim ən böyük sərvətimizdir. Azərbaycan bu illər ərzində böyük və şərəfli yol keçib, böyük nailiyyətlər əldə edib, böyük qələbələrə imza atıb. Biz fəxr edirik ki, Azərbaycan müstəqil, qüdrətli, dünya xəritəsində öz layiqli yerini tutmuş, öz sözünü söyləyən və maraqlarını qoruyan bir dövlətdir. Ötən il yaddaşımızda həm xoş anlarla, yeni nailiyyətlərlə, yeni qələbələrlə, həm də çətinliklərlə, çətin anlarla, itkilərlə qalacaq.

Azərbaycanın müstəqilliyi, ərazi bütövlüyünün bərpası, ölkəmizin daha qüdrətli, daha möhkəm olması yolunda şəhid olmuş bütün insanlara Allah rəhmət eləsin. Onların əziz xatirəsi Azərbaycan xalqının qəlbində daim yaşayacaq. Siz gənc nəsil onların əməllərini, ideyalarını həyata keçirəcəksiniz.

Mən bu gün artıq 12 ildir ki, bizim bu şənliklərə dəstək verən Azərbaycanın sənət adamlarına, bütün müğənnilərə, artistlərə öz dərin minnətdarlığımı bildirirəm. Mən sizə Yeni ildə cansağlığı, yeni nailiyyətlər arzulayıram.

Əziz dostlar, sizi qarşıdan gələn Dünya Azərbaycanlılarının Həmrəylik Günü və Yeni il münasibətilə səmimi qəlbdən təbrik edirəm. Sizə möhkəm cansağlığı, xoşbəxtlik, yeni nailiyyətlər arzulayıram. Qoy, Azərbaycan müstəqilliyimizin əbədiliyi naminə yaşasın, daim yaşasın, güclənsin! Çox sağ olun, sizi təbrik edirəm”.

Şənliyin sonunda hər bir iştirakçıya Heydər Əliyev Fondunun hazırladığı bayram hədiyyələri təqdim olunub.

 

Əlaqə
Ünvan: Yasamal rayonu, A. M. Şərifzadə küç. 157
Əlaqə nömrəsi: 012 444 74 44
Efir nömrəsi: 012 56 56 100
Whatsapp nömrəsi: 070 65 56 100
Reklam:
Mobil: 050 60 06 100
Şəhər: 012 444 74 44 (daxili 80695)

“ASAN Radio” Azərbaycan Respublikasının Prezidenti cənab İlham Əliyevin tapşırığına əsasən yaradılıb. 

24 dekabr 2015-ci il tarixindən etibarən Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində (“ASAN xidmət”) yayıma başlayıb. 

“ASAN Radio”ya 100 MHs tezliyində ümumrespublika radio yayımı üçün xüsusi razılıq (lisenziya) 2015-ci il sentyabrın 8-də Milli Televiziya və Radio Şurasının (indiki Audiovizual Şura) iclasında verilib.

“ASAN Radio” dövlət xidmətləri sahəsində ixtisaslaşan ilk və yeganə radiodur.

Xidmətlərlə yanaşı, “ASAN Radio” Azərbaycanda və dünyada baş verən vacib xəbərləri dinləyicilərinə birbaşa mənbədən, dəqiq və operativ çatdırır. 

Eyni zamanda, dinləyicilər bizim radioda aktual mövzuların müzakirə olunduğu maraqlı verilişlər və keyfiyyətli musiqi dinləyə bilir. 

“ASAN Radio” Bakıda və bölgələrdə 100, 96.5, 95.6 və 92.7 FM dalğalarında yayımlanır. 

Faydalı Məlumat dalğasını www.asanradio.az saytından və mobil tətbiqlərdən də dinləyə bilərsiniz. 

“ASAN Radio” - Dəqiq, Operativ, Faydalı!