Novruz bayramı tədbirlərinin keçirilməsi ilə paytaxtın bir sıra yolları bağlanıb. Bakı Şəhər Dövlət Yol Polisi İdarəsinin bölmə rəisi Vaqif Əsədovun verdiyi məlumata görə, mərkəzə yaxın, bayram tədbirləri keçirilən ərazidə olan bir çox yollarda nəqliyyat vasitələrinin hərəkəti məhdudlaşdırılıb.

V.Əsədov bildirib ki, bayramla bağlı olaraq Babək prospektinin Yusif Səfərov küçəsindən hava limanı, Nərimanov, Gənclik stansiyası istiqamətində, həmçinin Y.Səfərov Afiəddin Cəlilov küçələrinin kəsişmələrindən yalnız 10-cu zavod dairəsi istiqamətində, Yusif Səfərov Cavanşir körpüsü kəsişməsindən yalnız geriyə - 10-cu zavod dairəsinə, Yusif Səfərov 28 May küçəsindən yalnız düz - Rəşid Behbudov küçəsi istiqamətində, həmçinin Bakı-Salyan yolunun 14-cü km-dən ancaq sola - 3-cü Dairəvi yolla, eyni zamanda Bayıl qəsəbəsindən Bayraq Meydanı istiqamətində, Xanlar küçəsi iə Fəxri Xiyaban, Mehdi Hüseyn, ümumiyyətlə Badamdar qəsəbəsi istiqamətində, 20-ci sahə dairəsindən Dağüstü yolla Badamdar qəsəbəsindən keçməklə Mikayıl Müşviq küçəsi, Qurd qapısı istiqamətində, Neftçilər prospektində kəsişən Bülbül, Səməd Vurğun, Rəşid Behbudov və digər küçələrdə hərəkət məhdudlaşdırılıb və istiqamət dəyişdirilib. Bu da bayram tədbirlərinə qatılmaq istəyənlərin təhlükəsizliyini təmin etmək məqsədi daşıyır.