ADA Universitetinin Beynəlxalq və İctimai Münasibətlər İnstitutunun yeni bakalavr tələbələri arasında Oruclu Aqşin Raquf oğlu da var. O, bura daxil olmaqla öz arzusundan daha ümdə olan atasının arzusunu- 2016-cı ilin “Aprel döyüşləri”ndə böyük hünər, rəşadət göstərərək şəhidlik zirvəsinə ucalan polkovnik-leytenant Raquf Orucovun arzusunu yerinə yetirib. Bu barədə ASAN Radio ADA Universitetinə istinadən xəbər verir.

“Atam həmişə mənim ADA Universitetində təhsil almağımı istəyirdi. Xatırlayıram, bir neçə il əvvəl onun hərbçi dostunun övladı ADA-ya qəbul olmuşdu. Atam bunu bizə böyük sevinc və rəğbət hissi ilə danışırdı. Mən, onun keçirdiyi bu sevinc hissini təkrarlamaq istəyirdim. Düşünürdüm ki, əgər dostunun övladına görə belə sevinirsə, mən ADA-da oxusam necə sevinəcək?!” - deyə, Aqşin Orucov bildirib.

Vətən uğrunda canını qurban edən “Murov qartalı”nın oğlu Aqşin, gələcəkdə diplomat olub Vətənini informasiya müharibəsində qorumaq istəyir.

ADA Universitetində tələbə kimi qeydiyyatdan keçərkən onun sevincini bölüşən anası Sevinc xanım olub: “Raqufun arzusunun həyata keçdiyi üçün qürur duyuram. O, daim təhsilə önəm verirdi. Uzaqda olsa da, hər gün zəng edib uşaqların dərsləri, aldığı qiymətlərlə maraqlanırdı. Şadam ki, Aqşin də onun inamını doğrultdu. Raqufun ruhu bu gün bizimlə birgə fəxr hissi keçirir.”