Bakıda hal-hazırda davam edən "Avropa Tolerantlıq Festivalı" çərçivəsində növbəti film nümayişi keçirilib. “Park Cinema Flame Towers”də litvalı rejissor Andruis Stonysun ekranlaşdırdığı “Quzuların darvazaları” filmi tamşaçılara təqdm olunub.

Təqdimatdan sonra filmin rejissoru Andruis Stonys ilə həmsöhbət olduq. O, filmin festival çərçivəsi keçirilən təqdimatı ilə bağlı təəssüratlarını ASAN Radioya müsahibəsidə bölüşüb:

“Mən düşünürəm ki, bu çox mühüm festivaldır. Çünki bu festival tolerantlıqla bağlıdır. Bildiyimiz kimi tolerantlıq da müasir dövrdə ən əsas məsələlərdən biridir. Mən bu festivalda iştirak etdiyim üçün çox şadam. Filmimin təqdimatı zamanı burada, zalda müxtəlif dindən olan insanlar var idi və mən sonda onların filmlə bağlı təəssüratlarının müsbət olduğunu gördüm."

Rejissor Bakıda ilk dəfə olduğunu qeyd edib: “Bu mənim Bakıya ilk gəlişimdir.  Bakı ilə bağlı təəssüratlarım müsbətdir. Bakı çox gözəl şəhərdir. Mən  paytaxtınızı çox bəyəndim. Xüsusilə də Bakının memarlığı, insanları mənim xoşuma gəldi. Sonda festivalın təşkilatçılığı haqda danışmaq istərdim - çox gözəl təşkil olunub. Mən özümü burada çox rahat hiss etdim.”

Qeyd edək ki, festival iki məkanda “Landmark” və “Park Cinema Flame Towers”də  keçirilir.

ASAN Radio festivalın informasiya tərəfdaşıdır.