İtaliyanın Azərbaycandakı səfiri Augusto Massari ASAN Radionun qonağı olub. Augusto Massari Bakıda keçiriləcək "İtaliya mətbəxi həftəsi" ilə bağlı ASAN Radioya eksklüziv müsahibə verib.

- Salam, studiyamıza xoş gəlmisiniz. İlk sualım belə olacaq: Bakıda gözlənilən "İtaliya mətbəxi günləri" hansı tarixlərdə keçiriləcək?

- Bakıda "İtaliya mətbəxi həftəsi" noyabrın 20-dən start götürəcək və 26-a qədər, yəni 1 həftə davam edəcək. Bu təkcə Bakıda deyil, bütün dünyada qeyd ediləcək. Bu dünya miqyasında keçirilən bir təşəbbüsdür. "İtalyan mətbəxi həftəsi" İtaliya hökuməti, İtaliya XİN-i tərəfindən təşkil olunur. Dünyanın bütün ölkələrində fəaliyyət göstərən İtaliya səfirlikləri, konsulluqları, İtalyan Mədəniyyət institutu bir həftə ərzində "İtaliya mətbəxi həftəsi"ni təşkil edəcək.

- "İtaliya mətbəxi günləri"nin keçirilməsində məqsəd nədir?

- Belə bir həftəni təşkil etməkdə məqsəd İtaliya mətbəxini, İtaliya yeməklərini, şərabını təşviq etməkdir. Eyni zamanda, kommersiya və mədəni bir məqsəd daşıyır. Çünki bizim üçün yəni, italyanlar üçün yemək yemək, hazırlamaq, birlikdə yemək - bu sadəcə qidalanmaq, doymaq üçün deyil. Bu daha cox şey anlamına gəlir. Bu mədəniyyətdir. Bu portret çəkmək, hekayə yazmaq kimi bir şeydir. Bu həqiqətən də incəsənətin bir hissəsidir. Mükəmməl yemək, mükəmməl inqridientlər və bir qədəh şərab - incəsənətin bir hissəsidir.

-  Azərbaycan və İtaliyanın mətbəxində oxşarlıq var. Siz necə düşünürsünüz?

- Bəli, düşünürəm ki, bizim mətbəxlərdə oxşarlıq var. Məsələn, xəmir xörəkləri və təzə çörək. Bunlar hər iki ölkənin oxşar cəhətidir. Mən sizdə hazırlanan təndir çörəyini çox xoşlayıram. Mən həqiqətən küçədə gəzib bu çörəkdən alıb evə aparmağı və xanımımla, uşaqlarımla birgə bu çörəyi yeməyi çox sevirəm. Bu Bakıda ən çox sevdiyim işdir.

- Azərbaycan mətbəxini ümumiyyətlə bəyənirsinizmi və xoşladığınız yemək varmı?

- Ola bilsin, mən hələ burada çox şeyi kəşf etməmişəm. Çünki mən 3 ay bundan əvvəl Bakıya gəlmişəm. Amma artıq mənim sevimli xörəyim var. Bu düşbərədir. Mən həqiqətən də bu şorba növünü çox sevirəm. 

- Sonda Auqusto Massari hər kəsi Bakıda keçiriləcək İtalyan yeməkləri həftəsinə dəvət etdi və həftə ərzində İtaliya mətbəxinin tanıdılması ilə bağlı görüləcək tədbirlər barədə ətraflı məlumat verdi.

- Mən hər kəsi, hazırda bu proqramı dinləyənləri dəvət edirəm. Proqram haqqında, həftə haqqında ətraflı məlumat üçün səfirliyin rəsmi internet -veb səhifəsində, facebook səhifəsində tanış ola bilərlər. Xəzər Tv-nin “Nuş Olsun” verilişində isə canlı italyan aşbazların performansları, italyan yeməklərinin hazırlanması nümayiş etdirəcəklər. Axşamlar Bakıda bütün italyan restoranlarında italyan aşbazları tərəfindən hazırlanan şam yeməyi təşkil olunacaq. Burada İtalyanın ən məşhur şirkətlərinin şərablarının dadına baxa bilərlər. Biz İtaliyadan praktik qonaq da dəvət etmişik. Hansı ki, Boloniyada 100 yaşı olan qədim "Kontina Bentivolyo" restoranının sahibi, aşbazı gələcək və əl ilə spagettiləri hazırlayan qadınlar gələcək. Biz onları canlı performans göstərmək üçün dəvət etmişik. Beləliklə biz gerçək İtaliyanı Bakıya gətirməyə çalışdıq. Həmçinin Landmarkda yemək və şərabdan bəhs edən bir neçə italyan filmləri nümayiş olunacaq. Beləliklə filmlər vasitəsilə də siz italyan mətbəxi, yeməkləri və şərabını kəşf edə bilərsiniz.