Ölkəmizdə 2300-dən artıq tibb müəssisəsi, o cümlədən 1150-si paytaxtda, qalanları regionlarda olmaqla əhalinin sağlamlığının keşiyində dayanır. Hazırda ölkəmizdə fəaliyyət göstərən 2297 aptek müəssisəsinin 97-si topdansatışla məşğul olur. Topdansatış müəssisələrinin 77-si Bakıda, qalanları isə rayonlardadır. Tibbi ləvazimatların istehsalı ilə məşğul olan 4 şirkət var.

ASAN Radio AZƏRTAC-a istinadən xəbər verir ki, bu faktları səhiyyə nazirinin müavini Elsevər Ağayev jurnalistlərə müsahibəsində söyləyib.

Nazir müavinin verdiyi məlumata görə, son on ildə 600-dən çox tibb müəssisəsi yenidən qurulub və ya təmir edilib. Onun dediyinə görə, ölkədə səhiyyənin inkişaf səviyyəsinin əsas göstəricilərindən biri ana və uşaq ölümünün azalması, həmçinin təbii artımdır. On il əvvəl hər 100 min diridoğulan körpəyə 34 ölüm halı qeydə alınırdısa, indi həmin rəqəm 13,6-ya düşüb. Qeyd olunub ki, müsbət dinamikanı hemodializli xəstələrə qulluq sahəsində də müşahidə etmək olar. On beş il əvvəl həmin xəstələrə qulluq etmək imkanı yox idisə, indi 3 min nəfərdən artıq böyrək çatışmazlığı olan xəstəyə xidmət göstərmək üçün 34 hemodializ müəssisəsi var və onlardan 26-sı rayonlarda fəaliyyət göstərir.

Nazir müavini onu da söyləyib ki, ölkəmizdə 875 özəl tibb müəssisəsinin 430-u stomatoloji fəaliyyətlə məşğul olur və təəssüf ki, onların arasında lisenziyasız işləyənlər də var. Son vaxtlar onların barəsində 100-ə qədər protokol tərtib olunaraq inzibati cəza tətbiq edilib.