ADA Universiteti bu il başladığı “İnkişaf naminə 100 yeni tərəfdaş” adlı kampaniyası çərçivəsində biznes sektorunun liderləri ilə hesabat tədbiri keçirib. Qeyd edək ki, ADA Universiteti yarandığı ilk gündən məşğulluq bazarında təmsil olunan sektorlarla əməkdaşlıq etsə də, ölkədə “bilik iqtisadiyyatı“nın inkişafı bu əməkdaşlığı şaxələndirmək zərurətini ortaya qoyub. Yeni kampaniya çərçivəsində ADA şirkətlərlə üç əsas istiqamət üzrə işləyir: ADA tələbələri üçün müxtəlif sahələrdə staj imkanları, şirkətlər üçün İxtisasartırma Proqramları və tələbə təqaüdləri. Bu maliyyə dəstəyi hesabına həmçinin Universitetdə tələbələrin “start up” ideyalarını inkişaf etdirən “Innovasiya Mərkəzi” yaratmaq mümkün olub. Tədbirdə ADA tələbələri ən uğurlu start up layihələrini biznes sektoru liderlərinə təqdim etdilər.

ASAN Radio xəbər verir ki, hesabat tədbirini yekunlaşdıran Xarici İşlər Nazirinin müavini, ADA Universitetinin rektoru, səfir Hafiz Paşayev bildirib: “Müstəqil Azərbaycan Respublikası son illər bütün sahələrdə əhəmiyyətli inkişaf əldə etmişdir. Bizim ölkənin beynəlxalq miqyasda uğurlu olması üçün bütün resursları var. Lakin insan resurslarından hələ ki tam səmərəli istifadə edə bilməmişik. ADA Universitetinin missiyası Azərbaycana müxtəlif sahələrdə yüksək səviyyəli insan resursunun hazırlanmasını təmin etməkdir. Bu istiqamətdə Universitetin göstəriciləri məmnunluq doğurur- məzunların 90% Universiteti bitirdikdən üç ay sonra iş tapırlar.” Rektor vurğulamışdır ki, ADA Universiteti tək Azərbaycan üçün yox, qlobal miqyasda mükəmməl kadrlar yetişdirməyi qarşısına məqsəd qoyub. Bu istiqamətdə sənaye sektoru ilə yaxın münasibətlər qurmaq vacibdir. 

ADA Universitetinin tədbirinə 40 digər bzines sektorunun lidelrəri ilə qoşulan  "PricewaterhouseCoopers" (PwC) şirkətinin Azərbaycandakı nümayəndəliyinin idarəedici partnyoru  Mövlan Paşayev Universitetlə qurulan münasibətlərindən məmnunluğunu ifadə edib: “Bu günə kimi şirkətimizdə ADA Universitetinin 20 tələbəsi və məzunu staj və məşğulluq imkanlarından yararlanıb. Deyə bilərəm ki, bu gənclərin keyfiyyətcə fərqləndiyi dərhal nəzərə çarpır: onlar müasir biznes mühitinə uyğun, praktiki və ən son bilik və bacarıqlara malikdirlər. ADA Universitetinin təhsil fərqi də məhz bundadır.”