Qusarda yerləşən “Şahdağ” Turizm Mərkəzində altıncı qış mövsümünə start verilib.

ASAN Radio AZƏRTAC-a istinadən xəbər verir ki, dekabrın 16-dan etibarən 11 xizək lifti və 13 sürüşmə yamacı xizək və snoubord həvəskarlarının ixtiyarındadır.

Mövsümün təntənəli açılışında turistlərə canlı musiqi, DJ, açıq havada qış yarmarkası, uşaqlar üçün maraqlı əyləncələr və qonaqların istirahətinə rəng qatan başqa xidmətlər təqdim olunub.

Hər il olduğu kimi, bu qış mövsümündə də “Şahdağ” Turizm Mərkəzi müxtəlif əyləncələrlə qış istirahətini və aktiv istirahəti sevənlərin könlünü oxşayacaq. Xizək və snoubord sürmə ilə yanaşı, aeroxizək və kvadrosikl turları, ziplayn, peyntbol, at üstündə gəzinti, uşaqlar üçün kirşələr, buz meydançası kimi 13 növ qış əyləncəsi qonaqların ixtiyarında olacaq. Eləcə də qarla örtülən Şahdağ yamaclarını yüksəklikdən seyr etmək imkanı verən tandem paraplan uçuşlarına start veriləcək. Paraplan uçuşlarına keçən yay mövsümündən başlanılıb. Bu adrenalin dolu əyləncəyə həddindən çox maraq göstərildiyindən paraplan uçuşlarının qış mövsümündə də davam etdirilməsi nəzərdə tutulub.

Mərkəzin ərazisində 3 beşulduzlu (“Şahdağ Hotel və Spa”, “Pik Palace”, “Park Chalet”) və 1 dördulduzlu (“Zirvə”) hotel fəaliyyət göstərir. Hər il olduğu kimi, bu mövsüm də hotellər təkcə qonaqlama xidməti ilə deyil, eyni zamanda, 20-ə yaxın iaşə obyekti (restoran, kafe və bar), sağlamlıq və fitnes mərkəzi, spa xidməti, xizəklərin icarəsi və satışı məntəqəsi, uşaq bağçası, konfrans zalı və s. kimi xidmətlərlə qonaqların ixtiyarında olacaq.