Dekabrın 19-da Azərbaycan Tibb Universitetinin (ATU) rektoru yanında İctimai Nəzarət və Məsləhət Şurası (İNMŞ) növbəti monitorinq keçirib.

ASAN Radio xəbər verir ki, 3 saylı tədris binasında keçirilən monitorinqdə şuranın sədri, Millət vəkili, həkim qastroentroloq İlham Məmmədov və üzvləri - Azərbaycan Milli Qeyri-Hökumət Təşkilatları Forumunun Prezidenti Rauf Zeyni, “Cəmiyyətin və Vətəndaş Münasibətlərinin İnkişafı” İctimai Birliyinin sədri, QHT-lərin Antikorrupsiya Şəbəkəsinin üzvü Əhməd Abbasbəyli, “İki sahil” qəzetinin redaktoru, Mətbuat Şurası İdarə Heyətinin üzvü Vüqar Rəhimzadə, ATU-nun əzcaçılığın texnologiyası və idarəçiliyi kafedrasının baş müəllimi, “Gənc vətəndaş” İctimai Birliyinin sədr müavini Aidə Bəndəliyeva iştirak ediblər. 

Monitorinqlərin aparılmasında əsas məqsəd tələbələrin fikirlərini, rəylərini, şikayətlərini və təkliflərini  öyrənməklə ictimailəşdirmək, qarşıya çıxan problemlərin həllinə nail olmaqdır. 

Monitorinq zamanı insan anatomiyası, biologiya və tibbi genetika kafedralarında mühazirə zallarına, seminar və praktiki məşğələ otaqlarına daxil olan şura üzvləri tədris prosesini izləyiblər, tələbələrlə açıq diskussiya aparıblar.  Qarşılıqlı fikir mübadiləsi aparılarkən tələbə-müəllim münasibətlərinə də toxunulub. 

Tələbələr dərs yükü ilə müqayisədə  bəzi fənlərdən dərs saatının az olduğunu və bu amilin tədrisin keyfiyyətinə mənfi təsir göstərdiyini deyiblər. 

Təkcə mənfi hallara deyil, təqdir olunası məqamlara da diqqət yetirən şuranın üzvləri insan anatomiyası kafedrasında yaradılan tədris şəraitindən razı qaldıqlarını bildiriblər. 

Qeyd edək ki, qeydə alınan təklif və rəylər qruplaşdırılaraq müzakirə edildikdən sonra reydin nəticələri haqqında daha ətraflı məlumat veriləcək.