Cənubi Koreyanın nüfuzlu “The Korea Times” və “The Korea Post” qəzetlərində ADA Universitetinin fəaliyyəti haqqında məqalələr dərc olunub.

ASAN Radio xəbər verir ki, “Azərbaycanın ən beynəlxalq universitetin 2018-ci il mövsümü üçün qəbula başlayır” və “Azərbaycan daha çox koreyalı tələbə cəlb etməyə çalışır” başlıqlı məqalələrdə universitetin yaranma tarixi, fəaliyyət istiqamətləri, fakültələri, 46 ölkədən, o cümlədən Cənubi Koreyadan olan heyəti barədə məlumat verilib. Bildirilib ki, diplomatlar və dövlət qulluqçuları üçün təlimlərin təşkili məqsədi ilə 2006-cı ildə Xarici İşlər Nazirliyinin nəzdində Azərbaycan Diplomatik Akademiyası kimi fəaliyyətə başlayan təhsil ocağı hazırda ölkədə ən çox əcnəbi tələbə və müəllimin olduğu universitetdir.

Qeyd edilib ki, Bakının mərkəzində yaşıllıq ərazidə, yüksək ixtisaslı kadrların hazırlanması üçün ən müasir şəraitin yaradıldığı ADA Universitetində hazırda ictimai və beynəlxalq münasibətlər, biznes, humanitar elmlər, informasiya texnologiyaları və mühəndislik istiqamətləri üzrə bakalavr və magistr hazırlığı həyata keçirilir.

Məqalələrdə 2009-cu ildən bəri ADA Universitetinin əcnəbi tələbələr üçün “Əlimərdan bəy Topçubaşov” adına təqaüd proqramı təsis etdiyi, ali təhsil ocağının Cənubi Koreyanın Hankuk Xarici Dillər Universiteti, Koreya Elm və Texnologiya Universiteti də daxil olmaqla bir neçə xarici təhsil müəssisəsi ilə əməkdaşlıq etdiyi bildirilib.