BMT-nin Azərbaycandakı nümayəndəliyi və İsrailin ölkəmizdəki səfirliyinin birgə təşkilatçılığı ilə Holokost həftəsi çərçivəsində növbəti tədbir yanvarın 24-də Binəqədi Rayon Gənclər Evində keçirilib.

ASAN Radio xəbər verir ki, tədbirdə çıxış edən Binəqədi Rayon Gənclər və İdman İdarəsinin rəisi Elvin Aslanov tarixboyu müxtəlif millətlərin nümayəndələrinin soyqırımına məruz qaldığını bildirib. O deyib ki, yəhudi xalqı da İkinci Dünya müharibəsi illərində Holokost faciəsi ilə üzləşib. Bunun bəşəriyyətin faciəsi olduğunu deyən Elvin Aslanov vurğulayıb ki, bu cür faciələr Azərbaycan xalqına qarşı da yad deyil. Azərbaycan xalqı da ermənilərin törətdiyi Xocalı soyqırımına məruz qalıb.

BMT-nin İctimai İnformasiya Departamentinin Azərbaycandakı təmsilçisi Rəşad Hüseynov ölkəmizdə belə tədbirlərin təhsil ocaqlarında keçiriləcəyini və yeniyetmələrə həmin dövrün tarixindən bəhs olunacağını söyləyib. O bildirib ki, BMT-nin Maarifləndirmə Proqramının Hyuston Holokost Muzeyi ilə birgə hazırladığı 14 poster Holokost faciəsini yaşayan uşaqların taleyinə təsirindən bəhs edir. Layihənin əsas məqsədi Holokost zamanı həlak olmuş uşaqların xatirəsini anmaq və gəncləri nifrət hissinə qarşı mübarizəyə səsləməkdir.

İsrailin Azərbaycandakı səfirinin müavini Avital Rozenberq İkinci Dünya müharibəsi zamanı 6 milyon yəhudinin öldürüldüyünü ki, onların da 1,5 milyonunun uşaqların olduğunu deyib. İkinci Dünya müharibəsinin yəhudilər üçün unudulmaz faciə olduğunu deyən diplomat Azərbaycan xalqının bu müharibədə 300 min nəfərdən çox itki verdiyini bildirib.

Avital Rozenberq qeyd edib ki, gənclər və yeniyetmələr üçün nümayiş olunan “Holokostun uşaqları” adlı sənədli filminin qəhrəmanları İkinci Dünya müharibəsi illərində yəhudilərə qarşı aparılan siyasətdən əziyyət çəkmiş uşaqlardır. Diplomat Holokostun bəşəriyyət tarixinin ən böyük faciəsi olduğunu deyib.

Sonda tədbirdə iştirak edən məktəblilərə “Holokostun uşaqları” adlı sənədli film göstərilib.