11 may tarixində YARAT Müasir İncəsənət Məkanının "YAY" qalereyasında rəssam Aida Mahmudovanın "Umwelt" adlı fərdi sərgisi sənətsevərlərə təqdim olunub.

Sərgidə mədəniyyət və ictimaiyyət nümayəndələri, xarici və yerli rəssam və heykəltəraşlar iştirak edib. 

Rəssam öz fərdi sərgisi barədə ASAN Radioya açıqlama verib:

“Umwelt” zoopsixologiyada istifadə olunan psixoloji termindir və bu termin heyvanlarda və insanlarda dünyanın qavranması mənasını verir. Sərgimin kontekstində mən bu termini daha çox öz daxili dünyama və ətraf mühitin şəkillərdə qavranılmasına aid edirəm. Hər birimiz eyni mühitdə, eyni Yer kürəsində yaşayırıq və bir çox insanlar oxşar həyat tərzi sürürlər. Ümumiyyətlə insanların həyatları bənzərdir. İnsanlar bir-birilərinə çox oxşayırlar. Ama bir insanın digərindən tamam fərqlənən individual dünyası var. Və bu dünya o qədər fərqli, o qədər kənardır ki, bizə bəzən elə gəlir ki öz prizmamızdan baxanda biz başqaları haqqında kifayət qədər çox bilirik. Bu sərgi vasitəsiylə deməyə çalışıram ki, bəli bu mənim dünyamdır, mən onu sizin üçün açıram, bu mənim yaşadığım dünyaya baxışımdır."

Aida Mahmudova 2011-ci ildə əsası qoyulan YARAT Müasir İncəsənət Məkanının təsisçisi və bədii rəhbəridir. YARAT Azərbaycanda müasir incəsənətin ictimaiyyət tərəfindən dərk olunması və Azərbaycan incəsənətinin ölkə daxilində, eyni zamanda beynəlxalq səviyyədə təbliğ olunması ilə məşğuldur. Sərgi may ayının 13-dən etibarən ziyarətçilərin ixtiyarına veriləcək və avqustun 13-dək davam edəcək.