Avropa İttifaqının (Aİ) Azərbaycan nümayəndəliyinin təşəbbüsü ilə 2-ci "İmagine" Avropa Tolerantlıq Festivalının rəsmi bağlanış mərasimi  keçirilib. 

ASAN Radionun xəbərinə görə, Avropa İttifaqının Azərbaycan  nümayəndəliyinin rəhbəri Kestutis Yankauskas deyib ki, keçən il olduğu  kimi, bu il də festival musiqisevərləri çox məmnun edib.

Daha sonra çıxış edən "United.cultures"in icraçı direktoru Paola Kasaqrande bildirib ki, 2-17 may tarixlərində baş tutan festival çərçivəsində tolerantlıq, multikulturalizm və mədəniyyətlərarası dialoq kimi mövzuları əhatə edən tədbirlərdə 4 min nəfər iştirak edib. Builki festivalın proqramına Aİ-yə üzv 16 ölkənin və üzv olmayan 12 ölkənin 37 filminin nümayişi, 3 konsert, rejissor və musiqiçilərin iştirakı ilə 6 masterklass və 6 debatlar daxil idi.

Aİ-nin Azərbaycan nümayəndəliyinin  birinci müşaviri  Denis Danilids festival  barədə məlumat verərək "İmagine" festivalının hüdudlarının genişləndiyini bildirib.

Moldovanın Azərbaycandakı səfiri George Leuka festivalın çox əhəmiyyətli mədəni tədbir olduğunu söyləyib: "Moldova üçüncü dəfə də bu festivalda iştirak etmək fikrindədir. Həmçinin, bu il ərzində Azərbaycanda başqa mədəni tədbirlər də  təşkil etməyi nəzərdə tutmuşuq. Moldovanın müstəqillik günü ilə bağlı Azərbaycana  Moldovadan bəzi incəsənət nümayəndələrinin gətirilməsini planlaşdırırıq.  Bu ilin  oktyabr ayında isə Moldovada  Azərbaycan ədəbiyyat günləri  keçiriləcək".

Qeyd edək ki, ASAN Radio 2-ci "İmagine" Avropa Tolerantlıq Festivalına informasiya dəstəyi verib.