Bu gün futbol üzrə Azərbaycan Premyer Liqasında IV tura start veriləcək.

Qarşılaşmalar üç günü əhatə edəcək. İlk oyun günündə bir matç keçiriləcək. 

"Qarabağ" doğma azarkeşlər önündə "Sumqayıt"la üz-üzə gələcək. Bu komandalar Premyer Liqada indiyədək 24 görüşdə üz-üzə gəliblər. 17 matçda meydan sahibləri, 4 oyunda isə qonaqlar qələbəyə sevinib. 3 qarşılaşma isə heç-heçə başa çatıb. Topların fərqində də Ağdam təmsilçisi öndədir - 50:12. Ölkə çempionu rəqibinə qarşı son 11 oyunda meydanı xalsız və qolsuz tərk etməyib. “Sumqayıt” isə son 5 səfər oyununda məğlub olub.

Turun digər oyunu isə sabah baş tutacaq. "Səbail" "Bayıl Arena"da "Zirə" ilə münasibətlərə aydınlıq gətirəcək. Komandalar çempionat oyunlarında yalnız ötən mövsüm qarşılaşıblar. Dörd qarşılaşmanın 3-də "Zirə" qələbəyə sevinib, 1 matç isə heç-heçə yekunlaşıb. Topların fərqində də "Zirə" üstündür - 5:2. “Səbail” bu görüşlərdə qələbə qazanmamaqla yanaşı, hər oyunda qol buraxıb. “Zirə” hər iki səfər oyununda meydanı 1:0 hesablı qələbə ilə tərk edib.

IV turun digər iki qarşılaşması isə ertəsi gün olacaq. Premyer Liqanın debütantı "Sabah" komandası "Əlincə Arena"da "Qəbələ"ni qəbul edəcək. Bu komandalar indiyədək qarşılaşmayıblar.

Turun son matçında isə "Neftçi" və "Keşlə" komandaları münasibətlərə aydınlıq gətirəcək. Paytaxt klubları Premyer Liqada 55 oyunda üz-üzə gəliblər. 27 oyunda "Neftçi", 14-də isə "Keşlə" qələbə qazanıb. 14 qarşılaşma isə heç-heçə bitib. Topların fərqində də flaqmanın aşkar üstünlüyü var - 84:58. Rəqiblər 10 oyundur heç-heçə etmir. Komandalar arasındakı son 9 matçda 2 və ya daha çox qol vurulub. “Neftçi” son 5 ev qarşılaşmasında qələbə qazanıb.