ASAN Radioda yayımlanan "QəbuldASAN" verilişinin yeni mövsümdə ilk qonağı Dövlət Miqrasiya Xidmətinin rəisi Vüsal Hüseynov olub.

Veriliş boyu xidmət rəisi aparıcı Emin Musavinin müxtəlif suallarını cavablandırıb. O cümlədən, korrupsiya ilə mübarizə tədbirləri, şəffaflığın təmini məsələləri, ölkəmizə gələn turistlərin rahatlığı üçün göstərilən xidmətlərin əlçatanlığı, Azərbaycan vətəndaşlığına qəbul və vətəndaşlıqdan çıxma, qanunsuz miqrasiyaya qarşı mübarizə tədbirləri, qeyri-qanuni əməyə cəlb edilmə və s. problemlərə toxunulub.

Vüsal Hüseynov qeyri-rəsmi sualları da cavablandırıb. Sosial şəbəkələrin fəal istifadəçisi olan xidmət rəisi sosial medianın onun üçün önəmindən söz açıb. Verilişdə dinləyici sualları da cavablandırılıb. 

Yeri gəlmişkən, “QəbuldASAN“ verilişində iki qurumun yeni əməkdaşlığının təməli qoyulub. ASAN Radio Dövlət Miqrasiya Xidməti ilə birgə radio layihəyə start verir. Hər həftənin çərşənbə axşamı saat 11:05-də "Miqrasiya xidməti" adlı xüsusi veriliş efirdə olacaq. Layihə çərçivəsində DMX tərəfindən həyata keçirilən xidmətlərlə bağlı vətəndaşları maraqlandıran suallar cavablandırılacaq.