Jurnalist Camal Kaşıkçının Səudiyyə Ərəbistanının İstanbuldakı Baş konsulluğunun binasında qətlə yetirilməsi əvvəlcədən planlaşdırılıb.

AZƏRTAC Anadolu informasiya agentliyinə istinadla xəbər verir ki, bunu Səudiyyə Ərəbistanının Baş prokuroru Səud əl-Muacib deyib. “Türkiyədən aldığımız məlumatlar Camal Kaşıkçının ölümündə şübhəli bilinən şəxslərin cinayəti bilərəkdən törətdiyini göstərir”, - deyə baş prokuror bildirib.

Səud əl-Muacib prokurorluğun Səudiyyə Ərəbistanı və Türkiyənin müştərək təhqiqat qrupundan alınan məlumat əsasında istintaq tədbirlərini davam etdirdiyini də qeyd edib.

Xatırladaq ki, Camal Kaşıkçı oktyabrın 2-də sənədləşmə ilə bağlı Səudiyyə Ərəbistanının İstanbuldakı baş konsulluğuna gəlmiş və həmin vaxtdan itkin düşmüşdü. Oktyabrın 20-də Səudiyyə Ərəbistanının baş prokurorluğu jurnalistin konsulluqda öldüyünü təsdiqləmiş, lakin buna səbəb kimi diplomatik missiyada yaranmış mübahisəni göstərmişdi. Türkiyə Prezidenti Rəcəb Tayyib Ərdoğan isə oktyabrın 23-də Kaşıkçı işi barədə açıqlamasında səudiyyəli jurnalistin planlaşdırılmış bir cinayətin qurbanı olduğunu bildirmişdi.