3 dekabr- Beynəlxalq Əlillər Günü münasibətilə Avropa İttifaqı (Aİ) Birləşmiş Millətlər Təşkilatının İnkişaf Proqramı (UNDP), UNICEF, Heydər Əliyev Fondunun “Regional İnkişaf” İctimai Birliyi və ASAN Radio ilə birgə əməkdaşlıqla “Fərqliyik, Bərabərik” adlı film hazırlayıb.

Dekabrın 7-də filmin təqdimatı keçirilib.

Tədbirin moderatoru ASAN Radio-nun direktoru Emin Musavi bildirib ki, əlillərə və xüsusi qayğıya ehtiyacı olan insanları təkcə bir gün deyil, daim diqqət mərkəzində saxlamaq çox vacibdir. 

12 dəqiqəlik filmdə layihə tərəfdaşları əlilliyi olan şəxslərin inklüziv cəmiyyətin üzvləri hesab edilməli olduğunu, cəmiyyətin bütün üzvlərinin eyni hüquq və imkanlara malik olduğunu və digərləri ilə birgə təhsil ala biləcəyini vurğulamaq istəyirlər.

Aİ-nin Azərbaycandakı nümayəndəsi Kestutis Yankauskas çıxışında deyib ki, bu gün əsas diqqət mərkəzində olan məsələ inklüziv təhsildir. 

BMT-nin İnkişaf Proqramının rezident nümayəndəsinin səlahiyyətlərini icra edən Alessandro Frakassetti bildirdi ki, Bizim hər birimiz bu işdə dəstək olmalıyıq.

UNICEF-in Azərbaycandakı nümayəndəliyinin rəhbəri Edvard Karvardin qeyd eTdi ki, sağlamlıq imkanları məhdud insanlar bizimlə bərabər hüquqlara malikdir. 

Heydər Əliyev Fondunun “Regional İnkişaf” İctimai Birliyinin nümayəndəsi Cəmil Əliyev çıxışda dedi ki, hazırda İctimai Birlik tərəfindən ölkəmizdə müəllimlərin inklüziv təhsil sahəsində bacarıqlarının artırılması istiqamətində layihə reallaşdırılır. 

Sonra tədbir iştirakçıları “Fərqliyik, Bərabərik” filminə baxıblar. Rejissor Etibar Məmmədovdur.

“Fərqliyik, Bərabərik” video layihə KİV-də, o cümlədən telekanallar, həmçinin sosial media vasitəsilə geniş auditoriyaya çatdırılacaq. Filmə ASAN Radionun rəsmi səhifəsində baxa bilərsiniz.

Təqdimat mərasimindən hazırladığımız reportajı buradan dinləyin: