Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi və Birləşmiş Millətlər Təşkilatının Uşaq Fondu- UNICEF-in Azərbaycan nümayəndəliyinin birgə təşkilatçılığı ilə İnsan Hüquqları Gününə həsr olunmuş “Uşaq hüquqları uşaqların gözündə” adlı tədbir keçirildi. Qonaqlar Heydər Əliyev adına Müasir Təhsil Kompleksinin, 160 №-li klassik gimnaziyanın,  "Tərəqqi liseyi"nin və  XXI ƏSR / Beynəlxalq Təhsil və İnnovasiya mərkəzinin şagirdlərinin hazırladığı “Mənim hüquqlarım: uşaq hüquqları uşaqların gözündə”  və “ASAN Məktub” layihəsinin sərgiləri ilə tanış oldular.

UNİCEF-in Azərbaycandakı nümayəndəliyinin rəhbəri Edvard Karvardin sərgiylə bağlı təəssüratlarını jurnalistlərlə bölüşdü.

Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev sərgidə uşaqlar arasında ciddi maarifləndirmə işinin aparıldığının biruzə verdiyini diqqətə çatdırdı.

“Uşaq hüquqlarının təşviqi” layihəsi üzrə cari ilin noyabr ayından etibarən ekspertlər tərəfindən təlimçilər üçün proqram, maarifləndirici sessiyalar və uşaq hüquqlarının təşviqi günləri keçirilir. Həmçinin Bakı, Sumqayıt, Gəncə, Mingəçevir, Sabirabad, Bərdə, Masallı, Qəbələ və Qubada yaşayan əhalinin uşaq hüquqları sahəsində maarifləndirilməsi nəzərdə tutulur.