ASAN Radio xəbər verir ki, 7-9 oktyabr tarixlərində Bakı Ekspo Mərkəzində keçiriləcək Azərbaycan Beynəlxalq Təhsil sərgisi öz 10 illik yubileyini qeyd edir. 

Bu il “Təhsil” sərgisi dünyanın 14 ölkəsindən 118 iştirakçını bir araya gətirərək 60-dan çox fakültə təqdim edir. İştirakçılar arasında Azərbaycan, Almaniya, Belarus, İordaniya, Latviya, Litva, Macarıstan, Polşa, Çexiya ölkələrin ali təhsil müəssisəsi, kollec və başqa təhsil təşkilatlarının nümayəndələri də var.

Hər il sərgidə iştirak edən Azərbaycan Respublikası Təhsil Nazirliyi öz stendində ”Maarifçi”, “Sabah”, “Bir könüllü”, “Azərbaycan üçün öyrət” layihələrini təqdim edir. Həmçinin, Azərbaycan Dövlət Neft və Sənaye Universiteti ilə birlikdə Təhsil Nazirliyinin stendində Fransız-Azərbaycan Universiteti (UFAZ) təqdim olunur.

Bu il “Təhsil” sərgisində yenidən məktəbəqədər təhsil sektoru təqdim olunur. Bu sektorda Beynəlxalq Sabis Sun Məktəbi, "XXI Əsr" Beynəlxalq Təhsil və İnnovasiya Mərkəzi və «British School in Baku» iştirak edir.

Sərgi bir daha təhsil sahəsində çoxsaylı seçim imkanları təklif edən unikal platformaya çevriləcək. “Təhsil” sərgisinə giriş 9-11-ci sinif şagirdləri, eləcə də onların valideynləri, habelə abituriyentlər, tələbələr, məktəb direktorları, universitetlərin rektorları, təsərrüfat işləri üzrə prorektorlar və təhsil sahəsinin digər peşəkarları üçün açıq olacaq. Sərginin keçiriləcəyi günlərdə ziyarətçiləri metronun “Koroğlu” stansiyasından sərgi mərkəzinə və geriyə (ödənişsiz) daşıyacaq xüsusi avtobuslar təşkil olunacaq.

Qeyd edək ki, ASAN Radio Azərbaycan Beynəlxalq Təhsil Sərgisinə informasiya dəstəyi göstərir.