Avropa Qran Prisi yarışına biletlərin satıldığı ilk məntəqənin açılışı olub.

Bu barədə Bakı Şəhər Halqası Əməliyyat Şirkətindən (BŞH) daxil olan məlumatda bildirilir.

Bakı Şəhər Halqası Əməliyyat Şirkəti (BŞH) Park Bulvar ticarət mərkəzində bu ilin yayında Bakıda keçiriləcək Formula 1 Avropa Qran Prisi yarışına biletlərin satıldığı ilk məntəqənin açılışını edib.

Ticarət mərkəzinin birinci mərtəbəsində əsas giriş tərəfdə yerləşən məntəqə yarışa bilet almaq istəyənlərə həftənin hər günü, hələlik saat 10:00-dan 22:00-dək xidmət göstərəcək. Bu saatların gələcəkdə mövcud vəziyyətə görə dəyişdirilməsi nəzərdə tutulub. Bununla yanaşı yaxın günlərdə əlavə bir neçə bilet satışı məntəqəsinin açılışı gözlənilir.

Bakı Şəhər Halqası Əməliyyat Şirkətinin Kommersiya şöbəsinin rəhbəri Bülənt Özərdim bilet satışı məntəqələrinin fəaliyyətə başlamasına belə münasibət bildirdi: “Biz yerli Formula 1 həvəskarlarına Avropa Qran Prisinə bilet almanı asanlaşdırmaq üçün bu məntəqəni açdıq. Yerli tamaşaçılar onlar üçün təklif olunan imtiyazlı biletləri Bakı Şəhər Halqası Əməliyyat Şirkətinin rəsmi vebsaytı vasitəsi ilə yanaşı buradan da əldə edə bilərlər. Məhdud sayda bilet var. Biz hamını bilet almağa dəvət edirik. Bu işdə tələssinlər, sonraya bilet qalmaya bilər.”